ប្រភពពីអ្នកបានទៅសួរសុខទុក្ខវីជេ អាលីយ៉ា ដល់មន្ទីរពេទ្យកាល់ម៉ែត្រ កាលពីថ្ងៃទី២៣ មិថុនា ដែលបានទៅប្រឹក្សាជាមួយគ្រូពេទ្យជំនាញដោយផ្ទាល់បានអះអាងថា ស្ថានភាពជំងឺរបស់ នាង ដោយការលើកឡើងរបស់គ្រូពេទ្យជំនាញគឺស្ដាប់ហើយរន្ធត់ចិត្តតែម្ដង។ យ៉ាងណាមិញ ភាគីសាមីខ្លួនមិនបានថាស្ថានភាពជំងឺរបស់នាងធ្លាក់ដល់ដំណាក់កាលហ្នឹងនោះទេ ដោយនាងបានទាំងញញឹមថា និងថាមិនអីៗនោះផង។
តារាចម្រៀងមួយរូប ដែលជជែកជាមួយលោកគ្រូពេទ្យដោយផ្ទាល់ បានអះអាងថា ស្ថានភាពសួតរបស់កញ្ញា អាលីយ៉ា ស្ថិតក្នុងដំណាក់កាលពិបាកជួសជុលប្រសិនបើនាងមិនមានលទ្ធភាពវះកាត់នៅក្រៅប្រទេសដែលមានបច្ចេកទេសល្អពេទ្យក្នុងស្រុក។
ប្រភពដែលបានឆ្លងឆ្លើយជាមួយគ្រូពេទ្យបន្តថា វីជេអាលីយ៉ា នឹងអាចប្រឈមកាន់តែធ្ងន់ បើនាងនៅតែមិនមានលទ្ធភាពវះកាត់ដោះដូរសួត ឬបញ្ជូនទៅវះកាត់នៅក្រៅប្រទេស ដោយស្ថានភាពជំងឺរបស់នាងដែលអាក្រក់រាល់ថ្ងៃ នឹងកាន់តែអាក្រក់ថែមទៀតក្នុងអំឡុងពេលមួយខែក្រោយ ក្រោយពីបញ្ហារលាក និងមេរោគ កាន់តែរីករាលដាល។ តារាដែលអះអាងថាបានឆ្លងឆ្លើយជាមួយពេទ្យជំនាញបានទម្លាយដំណឹងដ៏តក់ស្លុតនោះបានថ្លែងបញ្ជាក់ថា«គ្រូពេទ្យប្រាប់ខ្ញុំហើយ ថាជំងឺសួតគាត់រលាកធ្ងន់ណាស់ ពេទ្យថាគាត់មើលទៅពិបាក»។ ការទម្លាយអោយដឹងពីការបញ្ជាក់ប្រាប់របស់គ្រូពេទ្យនេះ បានធ្វើអោយម្នាក់ៗមានការតក់ស្លុតហួសប្រមាណ ក្នុងពេលដែលនាងក៏ត្រូវគេឃើញស្ថិតក្នុងមន្ទីរពេទ្យកាល់ម៉ែត្រ ហើយមានសភាពចុះស្គម និងពឹងតែលើអុកស៊ីហ្សែនដើម្បីដកដង្ហើម។
នៅមិនទាន់មានការបញ្ជាក់លម្អិតពីស្ថានភាពជំងឺចុងក្រោយរបស់កញ្ញា អាលីយ៉ា អោយច្បាស់នោះទេ ដោយម្នាក់ៗបានដឹងត្រឹមថា នាងមានជំងឺរលាកសួត ហើយក៏មិនបានដឹងថាតើជំងឺរបស់នាងបណ្ដាលពីអ្វីនោះដែរ។ យ៉ាងណាមិញ បុគ្គល២រូប ដែលអះអាងថាបានឆ្លងឆ្លើយជាមួួគ្រូពេទ្យ២រូបផ្សេងគ្នាសុទ្ធតែអះអាងថា ជំងឺរបស់នាងស្ថិតក្នុងដំណាក់គួរអោយបារម្ភខ្លាំង។
យ៉ាងណាមិញ គេឃើញកញ្ញា អាលីយ៉ា នៅតែអាចនិយាយបានច្រើននៅឡើយទេ បើទោះជានាងត្រូវពឹងការដកដង្ហើមដោយអុកស៊ីហ្សែន ដោយសារតែសួតរបស់នាងលែងមានសមត្ថភាពធ្វើចលនាដង្ហើមបាត់ទៅហើយ។ ជាមួយនឹងការទម្លាយនេះ ទើបធ្វើអោយម្នាក់ៗតក់ស្លុតនៅពេលដែលដឹងថាជំងឺរបស់នាងស្ថិតក្នុងដំណាក់កាលចុងក្រោយ និងកាន់តែបារម្ភប្រសិនបើស្ថានភាពជំងឺនេះ នឹងធ្ងន់ជាងនេះក្នុងរយៈពេល១ខែទៀត៕
