ទើបតែហ្វឹកហាត់ជាមួយគ្នា មិនទាន់បានប៉ុន្មានលើកស្រួលបួលផង ខ្សែប្រយុទ្ធវ័យក្មេងប្រេស៊ីល Dounglas Costa បានចាប់ផ្តើមស្ងើចសរសើរ ពីមិត្តរួមក្រុមថ្មី Cristiano Ronaldo ។
បើតាមការចុះផ្សាយរបស់កាសែត AS បានឲ្យដឹងថា Dounglas បាននិយាយពីចំណុចមួយដែលកីឡាករភាគច្រើន មិនដែលធ្វើដូច Ronaldo ឡើយ ចាប់តាំងពីរូបគេចូលប្រឡូកក្នុងវិស័យបាល់ទាត់រួចមក។ Costa បានប្រាប់សារពត៌មានថា៖ នៅពេលដែលពួកយើងទៅដល់ទីលានហ្វឹកហាត់ ពួកយើងបានឃើញគាត់ ( Ronaldo ) កំពុងហ្វឹកហាត់មុនទៅហើយ, នៅពេលយើងបញ្ចប់ការហ្វឹកហាត់ត្រឡប់ទៅផ្ទះវិញ គាត់មិនទាន់បញ្ឈប់ការហ្វឹកហាត់ឡើយ ដោយបន្តការហ្វឹកហាត់ម្នាក់ឯងបន្តទៀត។ Costa បានឲ្យដឹងទៀតថា រូបគេមិនដែលឃើញកីឡាករដែលព្យាយាមហ្វឹកហាត់បែបនេះឡើយ អ៊ីចឹងហើយ បានជា Ronaldo មានវ័យជ្រេពោល ៣៣ឆ្នាំឈានចូល ៣៤ឆ្នាំទៅហើយក្តី តែកាយសម្បទា និងកម្លាំងរបស់ Ronaldo នៅតែមាំមួនដដែល ពោលដូចទើបអាយុ ២៣ឆ្នាំអ៊ីចឹង តាមការអះអាងរបស់ក្រុមគ្រូពេទ្យកន្លងមកនេះ។ មិនត្រឹមតែមានការព្យាយាមក្នុងការហ្វឹកហាត់ប៉ុណ្ណោះទេ ទម្លាប់ល្អមួយទៀត ដែល Ronaldo តែងតែធ្វើមិនដែលខកខាននោះគឺការតមអាហារ និងការចៀសវាងពីការបរិភោគគ្រឿងស្រវឹង ជាកត្តាចម្បងធ្វើឲ្យកីឡាករកំពូលរូបនេះ នៅតែរក្សាបាននូវកម្លាំង និងកាយសម្បទាមាំមួនដដែល។
ដូច្នេះហើយ Dounglas Costa ជឿជាក់ថា Ronaldoគឺជាកីឡាករទី១ ដែលរូបគេមិនដែលបានឃើញឡើយ ពោលគឺជាកីឡាករល្អបំផុតមួយរូបកម្ររកបានណាស់។
