ខុសពីម្ចាស់ខួបកំណើតភាគច្រើន ដែលតែងបួងសួងសុំអោយខ្លួនមានសុខភាពល្អ មានសម្រស់ស្រស់ស្អាត និងមានជោគជ័យក្នុងជីវិត សម្រាប់អ្នកគ្រូសរ កេសារ៉ា ម្ចាស់ផលិតកម្ម កេសារ៉ាភាពយន្ត បែរជាបួងសួងផ្សេង ក្នុងពិធីខួបកំណើតដែលបានធ្វើឡើងកាលពីថ្ងៃទី ១៤ កក្កដា ឆ្នាំ២០១៩។ ក្នុងពិធីនោះ ដ្បិតថាបានប្រារព្ធឡើងក្នុងបន្ទប់ខេធីវី ប៉ុន្តែបរិយាកាសក្នុងការរៀបចំគឺសប្បាយៗ និងអឹកអធឹក។
ពិធីខួបកំណើតរបស់អ្នកស្រី សរ កេសារ៉ា នៅក្នុងឆ្នាំនេះ មានការចូលរួមពីភ្ញៀវកិត្តិយសភាគច្រើនជាអ្នកមានមុខមាត់ ដោយក្នុងកម្មវិធីក៍មានសកម្មភាពដើរម៉ូត និងបកស្រាយបទចម្រៀងរបស់ក្រុមសិល្បៈមួយក្រុមនោះផង។ អ្នកស្រី កេសារ៉ា បញ្ជាក់ថា ខួបកំណើតឆ្នាំនេះ អ្នកស្រីមិនសូវផ្ដោតលើការជូនពរខ្លួនឯងនោះទេ ដោយអ្នកស្រីមានបំណងជូនពរអោយភ្ញៀវកិត្តិយស និងអ្នកសិល្បៈមានសុខភាពល្អ និងកាន់តែជោគជ័យនៅក្នុងសិល្បៈ។ អ្នកស្រីថា អ្នកស្រីចង់ឃើញតារាសិល្បៈទាំងអស់កាន់តែជោគជ័យទ្វេរដង និងកាន់តែមានការរីកចំរើនកុំអោយចាញ់ប្រទេសជិតខាង។ អ្នកស្រីនឹងបន្តដើរតួជាអ្នកចូលរួមលើកស្ទួយសិល្បៈ តាមរយៈការផលិតភាពយន្តថ្មីៗ និងបណ្ដុះបណ្ដាលអ្នកជំនាន់ក្រោយអោយមានជំនាញសិល្បៈតាមលទ្ធភាព ខណៈដែលអ្នកស្រីក៍នឹងបង្កើនសមត្ថភាពក្នុងការទាក់ទងផលិតករ និងអ្នករៀបចំកម្មវិធីនៅក្រៅប្រទេស ដើម្បីផ្ដល់ឱកាសអោយតារាខ្មែរបានកាន់តែច្រើនផងដែរ ខណៈដែលអ្នកស្រីធ្លាប់បានស្វះស្វែងអោយផលិតករខ្មែរ និងតារាខ្មែរ បានចូលរួមក្នុងមហោស្រពអន្តរជាតិនានា និងបានសម្ដែងជាមួយផលិតករបរទេសជាហូរហែរមកហើយ។ យ៉ាងណាមិញ អ្នកស្រីក៍សម្ដែងអារម្មណ៍ខកចិត្ត ចំពោះស្នាដៃផលិតកុនកន្លងមក ដែលទទួលបានការគាំទ្រតិចតួច។
អ្នកស្រី សរ កេសារ៉ា បន្តថា អ្នកស្រីធ្វើខួបកំណើតរាល់ឆ្នាំ គ្រាន់តែចង់ជួបជុំមិត្តភ័ក្ត្រ និងផលិតករតែប៉ុណ្ណោះ។ នៅក្នុងពិធីនោះ អ្នកស្រីដែលត្រូវគេស្គាល់ថា ជាតារាសម្ដែងជើងចាស់មួយរូប បានតែងឈុតជានារីខ្មែរ ដោយលម្អជាមួយនឹងផ្កាភ្ញីលើសក់ផង។ អ្នកស្រីថា ពិធីខួបកំណើតឆ្នាំនេះ អ្នកស្រីសប្បាយចិត្តបំផុតគឺបានជូនពរបងប្អូនអ្នកសិល្បៈគ្រប់រូប ដោយអ្នកស្រីបញ្ជាក់ថាសារជូនពររបស់អ្នកស្រី មិនមែនសម្រាប់តែតារាសិល្បៈ និងផលិតករដែលចូលរួមប៉ុណ្ណោះទេ តែក៍ជូនពរចំពោះតារាសិល្បៈទាំងអស់ តាមរយៈបណ្ដាញសារព័ត៍មានផងដែរ។
