ភ្ញាក់ផ្អើល ចម្លាក់តោថ្មធំ១ ក្នុងរចនាបថសម័យបាយ័ន្ត ត្រូវបានជជីកកកាយឃើញ

0
- Advertisement Banner -

មានការភ្ញាក់ផ្អើលមិនតិចទេ បន្ទាប់ពីរូបសំណាក់តោថ្មធំមួយ ដែលត្រូវបានគេស្គាល់ថាស្ថិតក្នុងរចនាបថបាយ័នអំឡុងសតវត្សទី១៣ ត្រូវបានប្រទះឃើញក្នុងកំឡុងពេលធ្វើកំណាយសិក្សាស្រាវជ្រាវរចនាសម្ព័ន្ធគ្រឹះកំពង់ទឹករបស់បារាយមេបុណ្យនៃប្រាសាទបន្ទាយ ដោយក្រុមការងារ លោកជំទាវ ម៉ៅ ម៉ាល័យ កែគឹមយ៉ាន។ នេះជារបកគំហើញដ៏កម្រថ្មីមួយ ដែលអ្នកស្រាវជ្រាវបុរាណប្រាសាទរកឃើញ។

កាលពីថ្ងៃចន្ទ ទី១០កើត ខែមាឃ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៣ ខែ កុម្ភៈ ឆ្នាំ២០២០ ក្នុងកំឡុងពេលធ្វើកំណាយសិក្សាស្រាវជ្រាវរចនាសម្ព័ន្ធគ្រឹះកំពង់ទឹករបស់បារាយមេបុណ្យនៃប្រាសាទបន្ទាយឆ្មារ មុនពេលចាប់ផ្តើមជួសជុល ក្រុមការងារបច្ចេកទេសនៃនាយកដ្ឋានគាំពារនិងអភិរក្សសំណង់បុរាណ បានរកឃើញចម្លាក់សត្វតោមួយស្ថិតក្នុងរចនាបថសម័យបាយ័ន្តស.វទី១៣ កប់ក្នុងដីជម្រៅប្រហែលជាងមួយម៉ែត្រ។ ដើម្បីការពារសុវត្ថិភាពចម្លាក់តោដែលទើបនឹងរកឃើញនេះ នាយកដ្ឋានបានសហការយ៉ាងជិតស្និទ្ធជាមួយនគរបាលបេតិកភណ្ឌប្រចាំការប្រាសាទបន្ទាយឆ្មារ ដោយចាត់កម្លាំងយាមកាមជាប្រចាំ។

សូមបញ្ជាក់ជូនថា បន្ទាប់ពីពិនិត្យឃើញ កំពង់ទឹកនេះទទួលរងនូវការខូចខាតស្ទើរតែបាត់រូបរាងអស់ទៅហើយនោះ ក្រសួងវប្បធម៌ និងវិចិត្រសិល្បៈបានអនុញ្ញាតគោលការណ៍ឲ្យមន្ត្រីបច្ចេកទេសនាយកដ្ឋានគាំពារ និងអភិរក្សសំណង់បុរាណ ចំណុះឲ្យអគ្គនាយកដ្ឋានបេតិកភណ្ឌនៃក្រសួងវប្បធម៌ និងវិចិត្រសិល្បៈ ធ្វើការអភិរក្ស និងជួសជុល ដើម្បីលើកតម្លៃសោភ័ណភាពនៃសំណង់កំពង់ទឹកមួយនេះឲ្យរស់ឡើងវិញ។ ការអភិរក្ស និងជួសជុលកំពង់ទឹកនេះ ទទួលបានការឧបត្ថម្ភថវិកាដ៏ថ្លៃថ្លាពីលោកជំទាវ ឧកញ៉ា ម៉ៅ ម៉ាល័យ កែ គឹមយ៉ាន។

ប្រធាន​មន្ទីរ​វប្បធម៌​ និង វិចិត្រសិល្ប​ ខេត្ត​បន្ទាយមានជ័យ​ លោក យង់ តាតាំងកួយថ្លែងបញ្ជាក់ថា ប្រជាពលរដ្ឋ ដែល​ស្រលាញ់​វត្ថុ​បូរាណ​ខ្មែរ​​មួយ​ក្រុម​ ក្រោមការដឹកនាំ និងចំណាយថវិកាដោយផ្ទាល់ របស់ លោកជំទាវ ម៉ៅ ម៉ាល័យ បាននាំគ្នាជួលជាងឱ្យជួសជុលប្រាសាទមេបុណ្យ​នៅ​​ឃុំ​បន្ទាយឆ្មារ​ ស្រុក​ថ្មពួក​​ ហើយ​ពេល​កាយ​ដី​ក៏​​ប្រទះ​ឃើញ​រូបចម្លាក់​តោ​ចំនួន​៦ កប់​ក្នុង​ដី​នៅ​កំពង់ទឹក​បូរាណ​​របស់​ប្រាសាទ​មួយ​នេះ​ ក្នុង​នោះ​ តោ​ដែល​រូបរាង​ស្អាត​ដូច​ទម្រង់​ដើម​មាន​១​ទម្ងន់​ជិត​១តោន​ និង​​៥​ទៀត​បែក​បាក់ ដៃ​ ជើង ក្បាល​និង​ដង​ខ្លួន ដាច់​ចេញ​ពី​គ្នា។ លោកបញ្ជាក់ទៀតថា វត្ត​បូរាណ​ទាំង​នេះ​អាជ្ញាធរ​បាន​រក្សា​ទុក​នៅ​ក្នុង​ប្រាសាទ​មេបុណ្យ​ដដែល ​ដោយ​មិន​បាន​យក​ទៅ​ដាក់​នៅ​ក្នុង​សារមន្ទីរ​ជាតិ​នោះទេ​ ពី​ព្រោះ​ដើម្បី​ទុក​ឱ្យ​ប្រជាពលរដ្ឋ​ និងអ្នកទេសចរបានចូលទស្សនាកម្សាន្ត នៅ​ពេល​ដែល​ទៅ​លេង​ប្រាសាទ​​នេះ។ លោកថាចំពោះ​តោ​ដែល​បែកបាក់​ ក្រុមការងារនឹងធ្វើការជួសជុល ហើយ​របស់​ណា​ដែល​ជួសជុល​មិន​បាន​ ក៏នឹងត្រូវរក្សាទុកមួយកន្លែង។

LEAVE A REPLY

Please enter your comment!
Please enter your name here