បន្ទាប់ពីមានការប្រកាសអោយម្ចាស់ពាន ជាទូតសុឆន្ទៈទាំង១២រូប បើកយុទ្ធនាការបោះឆ្នោតដណ្ដើមពានប្រជាប្រិយភាព ដើម្បីលើកពានលេចធ្លោមួយក្នុងចំណោមម្ចាស់ពាននៅពាក់កណ្ដាលឆ្នាំ២០២០ តារាចម្រៀងប្រចាំផលិតកម្មថោន កញ្ញា ប៑េប៑ី បានអះអាងថាកញ្ញា សុំមិនឈរឈ្មោះជាបេក្ខនារីម្ចាស់ពានមួយរូប ដើម្បីប្រជែងយកពាននេះទេ។ កញ្ញាថាខ្លួនចង់ទុកឱកាសអោយម្ចាស់ពានផ្សេងទៀត ស្របពេលដែលនាងក៍រវល់ច្រើននឹងការងារច្រៀងមិនមានពេលវេលាដើម្បីអោយបោះឆ្នោតអោយខ្លួនដើម្បីដណ្ដើមពានប្រជាប្រិយភាពផង។
លោក ផាត់ តារារដ្ឋ អ្នករៀបចំការប្រកួតឈុតបុរាណ និងជាស្ថាបនិកគ្រួសារតារាកម្ពុជា បានអះអាងថា ចាប់ពីពាក់កណ្ដាលខែសីហា នេះតទោ ការបោះឆ្នោតដណ្ដើមពានប្រជាប្រិយភាពពីសំណាក់ម្ចាស់ពានដែលជាទូតសុឆន្ទៈទាំង១២រូបនឹងត្រូវចាប់ផ្ដើម ដោយរៀងរាល់ដើមខែម្ដងនឹងបូកសរុបលទ្ធផលម្ដង ហើយបង្ហោះរូបថ្មីអោយធ្វើការបោះឆ្នោតទៀត។ រូបថតរបស់ម្ចាស់ពានដែលមានការ Like ១ ទទួលបាន៣ពិន្ទុ និង Share មួយទទួលបាន២ពិន្ទុ ខណៈដែលចំនួនLike និង Share នឹងត្រូវសរុបជារៀងរាល់១ខែម្ដង លើកលែងតែខែដំបូង ដែលរហូតដល់ផុតខែ៩ ទើបសរុបពិន្ទុ។ រូបថតរបស់ម្ចាស់ពាន ដែលកំណត់អោយបោះឆ្នោតនឹងត្រូវផ្លាស់ប្ដូរផ្អែកតាមសកម្មភាព ដោយអ្នកមានពិន្ទុនាំមុខប្រចាំខែ នឹងត្រូវបង្ហោះ និងផ្សព្វផ្សាយលើកទឹកចិត្តជាចំហរ។ ចាប់ពីខែទី៦ សមាសភាពម្ចាស់ពានដែលទទួលបានតួលេខ Like និង Share តិចជាងគេក្នុងចំណោមលទ្ធផលដែលសន្សំទុកតាំងពីខែទី១ នឹងត្រូវជ្រុះចេញមួយខែ២នាក់ៗ រហូតនៅសល់តែ៣រូប ឬ ៤រូប នៅខែកក្កដា ដើម្បីបន្តអោយមានការបោះឆ្នោត រហូតស្វែងរកឃើញម្នាក់អោុឈ្នះពានប្រជាប្រិយភាព។ យុទ្ធនាការនេះលោកថា នឹងជួយអោយបេក្ខជនបេក្ខនារីដែលមានឈ្មោះអោយគេបោះឆ្នោតកាន់តែល្បី ខណៈដែលប្រព័ន្ធផ្សព្វផ្សាយក៍ចាំជួយជំរុញ ដែលមិនមែនទាល់តែឈ្នះពានទើបមុខមាត់ដាច់នោះ។ យ៉ាងណាមិញ ក្នុងចំណោមម្ចាស់ពានទាំងអស់ កញ្ញា ប៑េប៑ី ដែលជាម្ចាស់ពានគ្រងឈុតបុរាណលេចធ្លោប្រចាំឆ្នាំ២០១៨ និងជាទូតសុឆន្ទៈរបស់គ្រួសារតារាកម្ពុជា ដែលមានសិទ្ធិដណ្ដើមពាននេះ បានប្រកាសដកខ្លួន ខណៈដែលកាលពីឆ្នាំមុន នាងបានឈរឈ្មោះប្រកួតម្ដងដែរ ប៉ុន្តែមិនទទួលបានជោគជ័យ ដោយសារខ្វះពេលគៀងគរហ្វេនៗ។
ប៑េប៑ី និយាយថាសម្រាប់ឆ្នាំនេះ នាងអត់ឈរឈ្មោះទេ ប៉ុន្តែសម្រាប់ការងារជាទូតសុឆន្ទៈ គឺនាងសកម្មអោយអស់លទ្ធភាពដើម្បីរួមចំណែកជួយសង្គម។ គួរបញ្ជាក់ថា ការប្រកួតឈុតបុរាណប្រជាប្រិយភាពឆ្នាំមុន បានលើម្ចាស់ពានលេចធ្លោត្រូវទម្រង់រួមជំនាន់ប្រចាំឆ្នាំ២០១៨ លោក រុនណាកូ ក្រោយបិទបញ្ចប់បោះឆ្នោត ក្នុងចំណោមម្ចាស់ពានសរុប៦រូប ដែលឈរឈ្មោះ។ ដោយឡែកឆ្នាំនេះ សរុបទាំងម្ចាស់ពានឆ្នាំថ្មីផង គឺមាន១២រូប ប៉ុន្តែប៑េប៑ី បានប្រកាសដកខ្លួន។