យោងតាមការបង្ហើបសំណាក់អ្នកគ្រប់គ្រងតាមរោងភាពយន្តទំនើប គឺភាពយន្តរឿង”ផ្ទះចុងភូមិ” របស់ផលិតកម្មមហាហង្សទទួលប្រាក់ចំណូលពីការលក់សំបុត្រយ៉ាងខ្លាំង មុនពេលទម្លាក់ចេញពីរោង។ ទើបតែកើបលុយពីភាពយន្តនេះ មិនទាន់បាត់ក្ដៅផង ផលិតកម្មមហាហង្ស ស្រាប់តែបញ្ចេញភាពយន្តមួយទៀតភ្លាមៗ ដោយភាពយន្តរឿង”ព្រលឹង” ដែលគ្រោងបង្អួតខ្លួនក្នុងរោងទំនើបនេះ ត្រូវបានផលិតកររំពឹងខ្ពស់ដូចគ្នា។
ភាពយន្តរឿង”ព្រលឹង” នេះ ទើបតែចេញ Trailer ប៉ុណ្ណោះ ដោយគ្រាន់តែចេញជា Poster និងប៉ាណូរឿងលើហ្វេសប៑ុក គឺមានការចាប់អារម្មណ៍តែម្ដង។ ប្រភពពីផលិតកម្មមហាហង្សបានអះអាងថា ភាពយន្តនេះនឹងក្លាយជារឿងដែលខ្លួនរំពឹងអាចកើបលុយបានច្រើន មិនខុសគ្នាពីភាពយន្តរឿង”ផ្ទះចុងភូមិ”នោះឡើយ ដោយសម្អាងលើគុណភាព និងសាច់រឿង បើទោះជាភាពយន្តរឿង”ផ្ទះចុងភូមិ” ជាប់ចំណាត់ថ្នាក់ជាភាពយន្តដែលកើបលុយបានខ្ពស់ក្នុងពេលបញ្ចាំង។
ភាពយន្តនេះត្រូវបានប្រកាសថា ចំណាយការផលិតអស់ច្រើន ហើយសម្រាប់បញ្ហាបច្ចេកទេស ក៍រឹតត្បិតខ្លាំង ដើម្បីតម្រូវទីផ្សារភាពយន្តខ្មែរផងដែរ នៅក្នុងកាលៈទេសៈដែលអ្នកគាំទ្រ កាន់តែចេះមើលកុន ខណៈដែល Poster និង Trailer គឺគ្រាន់តែបង្ហោះឡើងក៍ធ្វើអោយមានការកោតសរសើរ។ ភាពយន្តនេះគ្រោងប្រកាសលក់សំបុត្រនៅថ្ងៃទី៤ កក្កដា ខែក្រោយ ដោយអ្នកគាំទ្រក៍រំពឹងថាហោចណាស់ ក៍បានចំណូលអាចតាមស្មើនឹងប្រាក់ចំណូលរបស់រឿង”ផ្ទះចុងភូមិ”មុននេះ៕
