តារាសម្ដែងមួយរូបលង់ទឹកស្លាប់ ក្នុងដំណើរជាមួយ លោក យូឌីស្កូ

ពិតជាមានការភ្ញាក់ផ្អើលយ៉ាងខ្លាំង ដែលតារាសម្ដែងថ្មោងថ្មីមួយរូបត្រូវបានទទួលមរណភាពយ៉ាងក្ដុកក្ដួលដោយសារតែលង់ទឹកស្លាប់ ក្នុងដំណើរទៅកម្សាន្តនៅខេត្តកំពតជាមួយនឹងតារាសម្ដែង លោក យូឌីស្កូ។ សពរបស់លោកត្រូវបានដឹកមកធ្វើបុណ្យនៅវត្តទឹកថ្លា ខណៈដែលអ្នកលេងហ្វេសប៊ុកសម្ដែងការភ្ញាក់ផ្អើលយ៉ាងខ្លាំង ដែលលោកកំពុងមានសន្ទុះក្នុងសិល្បៈ ក៍មានដំណឹងរន្ធត់បែបនេះ។

យោងតាមការបង្ហោះរបស់លោក អ៊ឹម ជីវ៉ា ដែលបានទៅដល់កន្លែងតម្កល់សព និងបានសម្ភាសន៍សួរនាំដោយផ្ទាល់ជាមួយគ្រួសារសពបានអះអាងថា ក្នុងដំណើរទៅលេងទឹកនៅខេត្តកំពតនោះ គឺសាមីខ្លួនបានទៅជាមួយតារាសម្ដែងលោកយូឌីស្កូ ហើយក៍ជួបគ្រោះថ្នាក់លង់ទឹកស្លាប់នៅក្នុងពេលនោះ។ លោក អ៊ឹម ជីវ៉ា បានបង្ហោះជាសាធារណៈថា”សូមជួយShareផង តារាសម្តែង លោក រឿន សារ៉ាត់ បានទទួលមរណភាព នៅថ្ងៃទី២២ ខែ មករា​​​ឆ្នាំ២០១៩ ដោយសារលង់ទឹកស្លាប់ ក្នុងពេលធ្វើដំណើរទៅដើរលេង ជាមួយតារាសម្តែង លោក យូឌីស្កូ នៅខេត្តកំពត RIP។ ហេតុដូចនេះ សូមបងប្អូន និងមិត្តរួមអាជីពជាតារាសម្តែងជាមួយទទួលដំណឹងយ៉ាងសោកស្តាយពីក្រុមគ្រួសារនៃសព​ ក្រុមគ្រួសារគាត់ក្រីក្រណាស់ហើយបើបងប្អូន​​​និងមិត្តរួមអាជីពមានសទ្ធាជ្រះថ្លាអាចចូលជាបច្ច័យ​​តាមរយៈលេខទូរស័ព្ទ ប៉ារបស់គាត់ផ្ទាល់តែម្តង​ 016 91 59 86 សពតម្តល់នៅវត្តទឹកថ្លា​ ហើយនិងត្រូវបូជានៅវត្តទឹកថ្លា នៅវេលារម៉ោង ២ រសៀល នេះ RIP ។
ដោយក្តីគោរពជូនដំណឹងអំពីខ្ញុំបាទៈ អ៊ឹម ជីវ៉ា”។

នៅមិនទាន់ដឹងថា ហេតុភេទដែលនាំអោយតារាសម្ដែងរូបនេះទទួលមរណភាពដោយសារលង់ទឹក ដោយសារតែមានបញ្ហាអ្វីបន្ថែមនៅឡើយទេ ក្នុងពេលដែលលោក យូឌីស្កូ នៅមិនទាន់បានសុំការសម្ភាសន៍លម្អិត។