តារាសម្ដែង និងជាតារាហ្វេសប៑ុកស្រស់សោភា កញ្ញា ដេនី ក្វាន់ បានប្រកាសអោយដឹងពីគម្រោងសាងសង់ម៉ូតែលស្នាក់នៅរបស់ភ្ញៀវទេសចរណ៍ ដែលជាប្រភេទផ្ទះសំណាក់ទ្រង់ទ្រាយធំរបស់ខ្លួន គួរអោយភ្ញាក់ផ្អើល ខណៈដែលគម្រោងនេះ គ្រាន់តែឃើញគំនូសប្លង់ គឺមិនតិចជាងសែនដុល្លារ។ គម្រោងនេះ ត្រូវបានអះអាងថា កំពុងសាងសង់ ដើម្បីអោយឆាប់រួចរាល់ក្នុងពេលឆាប់ៗ។
កញ្ញា ដេនី ក្វាន់ ថ្លែងប្រាប់វេបសាយ”ផ្ទះតារា”ថា កញ្ញាបានសម្រេចសាងសង់ម៉ូតែលយីហោ”ម៉ូតែលដេនីក្វាន់” នៅស្រុកកំណើតរបស់ខ្លួន គឺខេត្តព្រះវិហារ ដោយសារតែកញ្ញាស្រលាញ់អាជីពបើកផ្ទះសំណាក់នេះជាយូរមកហើយ។ ផ្ទះសំណាក់នេះមានចំនួន៣០បន្ទប់ ដោយកញ្ញាច្នៃឡើងជារបៀបខ្មែរទាំងអស់ ដើម្បីទាក់ទាញអ្នកទេសចរណ៍ឡើងចុះខេត្តព្រះវិហារ កុំអោយមើលរំលង។ នាងថាគម្រោងនេះ កំពុងសាងសង់រាល់ថ្ងៃ ដោយការចំណាយជាក់ស្ដែង ស្ទើរតែធ្វើអោយនាង រកលុយទប់មិនបាននោះទេ។ នាងថ្ងូរនឹងការចំណាយក្នុងគម្រោងមួយនេះមិនតិចនោះទេ ខណៈដែលខ្ទង់ចំណាយទាំងមូលអស់ប៉ុន្មានសែន ឬ ដល់ខ្ទង់លាន ក៏មិនទាន់ដឹង។ ដេនី ក្វាន់ និយាយថា”រាល់ថ្ងៃដោយសារគម្រោងហ្នឹងចំណាយច្រើនទៅៗ ខ្ញុំចង់ដាច់បាយ ហើយបើនិយាយពីការចំណាយក៏ស្មានអត់ដឹងដែរ ព្រោះវាដឹងតែទៅហើយ”។
ជាមួយនឹងការប្រកាសអោយដឹងជាសាធារណៈ ធ្វើអោយម្នាក់ៗភ្ញាក់ផ្អើលនឹងភាពជោគជ័យរបស់នាងយ៉ាងខ្លាំង ដែលក្រៅពីជោគជ័យលើមុខជំនួញអនឡាញ ក៏ប្រកាសសង់ផ្ទះសំណាក់បែបខ្មែរ ក្នុងទំហំដើមទុនមិនធម្មតា ដែលបង្ហាញពីជោគជ័យថ្មីមួយទៀត។ ផ្ទះសំណាក់របស់នាងត្រូវបានសាងសង់លើផ្ទៃដី៥ហិកតា ដោយនាងប្រកាសថា គឺទោះជាអស់ប៉ុន្មានក៏ត្រូវតែសាងសង់អោយដូចគំរូប្លង់ និងអោយឆាប់រួចរាល់តាមការគ្រោងទុក។ យ៉ាងណាមិញគេមិនដឹងថា នាងនឹងបើកសម្ពោធធំ ក្រោយពេលរួចរាល់ ឬ យ៉ាងណានោះទេ ដោយសារផ្ទះសំណាក់នេះ នៅដល់ខេត្តព្រះវិហារបែបនេះ។
