ពិតជាគួរអោយកោតស្ងប់ស្ងែងនឹងតារាចម្រៀងកំព្រាឳពុកម្ដាយ លោក វង្ស ថាណាន់ យ៉ាងខ្លាំង ដែលលោកត្រូវគេដឹងថាគឺជាអតីតក្មេងអត់ទីពឹងនៅក្នុងមណ្ឌល ហើយទើបប្រឡូកសិល្បៈប្រមាណជាប៉ុន្មានឆ្នាំចុងក្រោយ ស្រាប់តែមានដំណឹងថាមានទ្រព្យផ្ទាល់ខ្លួនប្រហាក់ប្រហែលនឹងជិត២០មុឺនដុល្លារ។ លោកត្រូវគេដឹងថា ទើបតែទិញផ្ទះ៣ជាន់ជាង១៣មុឺនដុល្លារ និងទើបទិញរថយន្តស៑េរី២០១០ តម្លៃជិត៣មុឺនដុល្លារយ៉ាងកាលីប។
លោក វង្ស ថាណាន់ បានសារភាពថា ខ្លួនពិតជាទើបតែទិញផ្ទះមួយជុងនៅបុរីពិភពថ្មីចម្ការដូងតម្លៃជិត១៤មុឺនដុល្លារ និងទើបទិញរថយន្តម៉ាកព្រុស ឆ្នាំ២០១០ តម្លៃជាង២មុឺនដុល្លារព្រមគ្នាកាលពីក្រោយចូលឆ្នាំក្ដៅៗ។ យ៉ាងណាមិញលោកថា ទ្រព្យធំទាំងពីរ ដែលមានតម្លៃជិត២០មុឺនដុល្លារនោះ ក៍មានចំណែកជ្រោមជ្រែងពីបងប្រុសរបស់លោក ដែលជាអ្នកជួយលោក បន្ទាប់ពីលោកចេញពីមណ្ឌលកុមារកំព្រាផងដែរ។ ជាមួយនឹងដំណឹងមានទាំងផ្ទះ និងរថយន្ត តម្លៃមុឺនដុល្លារ យ៉ាហកាលីបនេះ ធ្វើអោយលោក វង្ស ថាណាន់ ទទួលបានការចាប់អារម្មណ៍យ៉ាងខ្លាំង ខណៈដែលតារាល្បីឈ្មោះមិនតិចទេ ប្រឡូកសិល្បៈមុនលោក សូម្បីតែរថយន្តជីះអោយសមរម្យមួយក៍មិនមាន។
លោក វង្ស ថាណាន់ និយាយថា ដោយសារតែលោកធ្លាប់ក្រ គឺលោកមិនដែលចាយវាយលុយកាក់ដែលខ្លួនរកបានស្រួលៗនោះទេ ទើបលោកចេះតែសន្សំលុយបានគួរសម ហើយដោយមានការជ្រោមជ្រែងពីបងចិញ្ចឹមនោះផង ទើបធ្វើអោយលោកមានលទ្ធភាពទិញផ្ទះ និងរថយន្តព្រមគ្នា។ លោកមិនទាន់ច្បាស់ពីគម្រោងឡើងផ្ទះពេលណានោះទេ ដោយសារតែការរៀបចំមិនទាន់រួចរាល់ ប៉ុន្តែអាចនឹងធ្វើឡើងផ្គួបគ្នា នឹងពិធីខួបកំណើត។
