ក្រោយពីល្បីបទ «មេម៉ាយសប្បាយចិត្ត» រួចមកតារាចម្រៀង រ័ត្ន រចនា ត្រៀមចេញ Original Song ផ្ទាល់ខ្លួនដើម្បីបំពេញចិត្តពុកម៉ែបងប្អូនដែលស្រឡាញ់គាំទ្ររូបនាង មួយរយៈ។
រ័ត្ន រចនា ថា ដោយសារតែមហាជនមួយចំនួនចង់ឃើញនាង មានចម្រៀងផ្ទាល់ខ្លួនច្រៀងទើប អ្នកនិពន្ធម្នាក់ដែលធ្លាប់សាងកេរ្តិ៍ឈ្មោះល្បីល្បាញនៅថោនគឺលោក យឹម តាស្រង់ សម្រេចចិត្តធ្វើបទ Original song ឲ្យនាងច្រៀងតែម្ដងទៅ។ ការចេញចម្រៀងថ្មីលើកដំបូងនេះនាង សង្ឃឹមថានឹងទទួលបានការគាំទ្រពីពុកម៉ែបងប្អូនផងដែរ។
ចំពោះ Original song ជាប្រភេទបទអ្វី រ័ត្ន រចនា សុំលាក់សិនព្រោះចង់ឲ្យអ្នកគាំទ្រមានការភ្ញាក់ផ្អើលនៅពេលបទថ្មីមួយនេះបង្ហោះនៅលើYoutube ឬ Face book ក្នុងពេលឆាប់ៗនេះ។ ប្រសិនបើ Original Song របស់ខ្លួនលើដំបូងចេញមកទទួលបានការគាំទ្រពីទស្សនិកជននោះនាង នឹងមានគម្រោងផលិតបទថ្មីបន្តបន្ទាប់ទៀត។
រ័ត្ន រចនា បន្ថែមថា ការផ្ដល់កម្លាំងចិត្ត និងជួយគាំទ្រពីពុកម៉ែបងប្អូនគឺជាថ្នាំទិព្វដ៏ពិសេសមិនអាចកាត់ថ្លៃបានដែលធ្វើឲ្យនាង ក៏ដូចជាអ្នកនិពន្ធមានកម្លាំងចិត្តក្នុងការផលិតបទថ្មីបន្តទៅទៀត។ បើគ្មានការជួយជ្រោមជ្រែងពីសំណាក់មហាជនទេនាង ក៏មិនអាចល្បីល្បាញទៅបានដែរ។
គួរបញ្ជាក់ថា ក្រោយពីល្បីបទ”មេម៉ាយសប្បាយចិត្ត” រួចមកគេកត់សម្គាល់ឃើញថា រ័ត្ន រចនា ចាប់ផ្ដើមមានទីផ្សារការងារសិល្បៈស្ទើររកពេលសម្រាកគ្មានទាំងនៅរាជធានីភ្នំពេញ និងតាមបណ្ដាខេត្ត។ ឯតម្លៃខ្លួននាង ក៏ឡើងខ្ពស់ទៅតាមហ្នឹងដែរ។ ជាក់ស្ដែងថ្មីៗនេះនាង ត្រូវបានឧកញ្ញា វ័យក្មេង ឡេង ណាវ៉ាត់ត្រា អញ្ជើញឲ្យទៅច្រៀងនៅប្រទេសកូរ៉េនាឱកាសឆ្លងឆ្នាំសកលនេះផងដែរ៕
