បុប្ផាទេវី – ផ្ទះតារា – PHTEASDARA

មកដឹងពីរឿងខាងក្រោយខ្នង ពីម៉ូដែល គង់ សោម៉ា ក្នុងឈុតអប្សរា

សំណព្វ — Thu, 13 Oct 2022 17:00:45 +0000

រូបថតប៉ុន្មានសន្លឹក ពីកញ្ញា គង់ សោម៉ា ដែលលោកអ្នកបានឃើញនេះ គឺពិតជាបង្ហាញពីភាពរស់រវើកនៃតួអង្គអប្សរាយ៉ាងទាក់ភ្នែកតែម្ដង ខណៈដែលរូបដែលបានបង្ហាញនេះ ក៏ជារូបអប្សរា Outdoor ដ៏កម្រ ព្រោះជារូបដែលបានថតផ្ទាល់នៅខាងមុខព្រះបរមរាជវាំង ហើយជារូបដែលថតនៅវេលាម៉ោងប្រមាណជាម៉ោង1យប់ ដែលជាវេលាយប់ស្ងាត់គ្មានការរំខាន និង ដោយសារតែក្រុមការងារចង់បានពន្លឺមួយដ៏ល្អនៅខាងមុខព្រះបរមរាជវាំង។

លោក ផាត់ គង់ ម្ចាស់ហាង Mirror Studio ជាអ្នកផលិតរូបថតនេះដោយផ្ទាល់ បានលើកឡើងថា ដោយសារតែចង់បានប្លង់អប្សរានៅជាប់ព្រះបរមរាជវាំង ហើយចង់ថតដោយគ្មានការរំខាន ទើបក្រុមការងារថតរូបរបស់លោក និង ក្រុមសម្អាងការ ពិផាអង្គរសម្អាងការ បានសហការគ្នាផលិតប្លង់នេះឡើង ដោយក្រោយការថតរូបបានជាច្រើនប៉ុស្តិ៍ គឺធ្វើអោយលោកយល់ថា រូបថតដែលបានផលិតរូចនេះ ហាក់មានព្រលឹងអប្សរក្នុងពេលថតនោះផង ទើបធ្វើអោយ ម៉ូដែល កញ្ញា គង់ សោម៉ា ហាក់ដូចជាអប្សរាពិតៗ ទាំងកាយវិការ និង ទឹកមុខ។ លោកថានេះ ជារូបអប្សរដែលភ្ជាប់នឹងព្រះបរមរាជវាំងដ៏កម្រ ហើយនៅពីក្រោយរូបដ៏រស់រវើកនេះ ក៏បង្កប់នូវការច្នៃប្រឌិត ទាំងខាងលោក ទាំងសម្អាងការ និង ក្រុមការងារផងដែរ ទើបអាចអោយរូបទាំងប៉ុន្មានសន្លឹកនេះ ក្រៅពីស្អាត ទាក់ភ្នែក ក៏មើលទៅពោរពេញដោយអត្ថន័យ និង ភាពរស់រវើក។

លោកថា ក្រុមការងារថត Mirror Studio នឹងបន្តស្វែងគំនិតប្លែកៗក្នុងការផលិតរូបថត Fashion ទាំងសម័យ និង បុរាណ អោយកាន់តែទទួលបានភាពទាក់ទាញ ដោយលោកបញ្ជាក់ថា តារាៗ និង អ្នកចង់ថតអោយមើលទៅទាក់ភ្នែក ហើយទទួលការចាប់អារម្មណ៍ គឺខាងស្ទីឌីយោរបស់លោក នឹងផ្ដល់ជាជម្រើសច្រើនបែប ដោយសារតែលោក និង ក្រុមការងារសុទ្ធតែមានជំនាញស្រាប់ មិនថាថតរូបបែបបុរាណ និង Fashion បែបសម័យ។ ស្នាដៃប៉ុន្មានសន្លឹករបស់លោកនេះ ក៏ធ្វើអោយម៉ូដែល គង់ សោម៉ា កំពុងទទួលបានការចាប់អារម្មណ៍មិនតិចផងដែរ ដោយសារតែស្ទីលថតនាកណ្ដាលយប់ ហើយភ្ជាប់នឹងព្រះបរមរាជវាំង នៅខាងក្រោយខ្នងបែបនេះ គឺមិនខុសពីផ្សព្វផ្សាយអប្សរាខ្មែរ និង ព្រះបរមរាជវាំងខ្មែរ។

គួរបញ្ជាក់ផងដែរថា របាំអប្សរាគឺជាស្នាព្រះហស្ថ នៃព្រះមហាក្សត្រយានី ស៊ីសុវត្ថិ ព្រះកុសមៈនារីរ័ត្នសិរីវឌ្ឍនានៅឆ្នាំ ១៩៦១ ( ព្រះអង្គគឺជាមាតានៃសម្តេច ព្រះនរោត្តម សីហនុ) ។ កាលនោះ ព្រះមហាក្សត្រយានី ស្តេចយាងទៅធ្វើព្រះរាជទស្សនកិច្ចនៅសាលាបឋមសិក្សា សុធារស។ នាយិកាសាលា ដែលបានរៀបចំពិធីសិល្បៈកុមារ បានកាត់ក្រដាសធ្វើជាមកុដ ដូចគ្នា នឹងមកុដអប្សរាឆ្លាក់ជាប់ជញ្ជាំងប្រាសាទអង្គរវត្តបេះបិទ។ រឿងនេះ ញ៉ាំងឲ្យព្រះមហាក្សត្រយានីផ្តួចផ្តើមគំនិត បង្កើតរបាំនេះឡើង បានប្រសិទ្ធិនាមថា “ របាំអប្សរា ” ។ សម្តេចព្រះរាម នរោត្តមបុប្ផាទេវី គឺជាតួឯកអប្សរាទីមួយ ។ពាក្យ “អប្សរា ” គឺជាពាក្យផ្សំខ្មែរ និង សំស្រ្កឹត មានន័យថា របាំទេវៈ របាំទេពអប្សរ ឬ របាំទេវតា។បើនិយាយពីគ្រឿងតុបតែងកាយមកុដអប្សរានិងក្បាច់រាំជាដើមសុទ្ធតែបានចម្លងតាមគំរូអប្សរានៅតាមជញ្ជាំងប្រាសាទអង្គរវត្តទាំងអស់។របាំអប្សរា គឺជារបាំមួយក្នុងបណ្តារបាំព្រះរាជទ្រព្យឬរបាំក្បាច់បុរាណខ្មែរដែលត្រូវបានអង្គការ យូណេស្កូទទួលចុះក្នុងបញ្ជីបេតិកភណ្ឌអរូបរីនៃមនុស្សជាតិ ( Intangible Heritage of Humanity) កាលពី ថ្ងៃទី ០៣ វិច្ឆិកា ២០០៣។

ផលិតដោយ ពិផាអង្គរសំអាងការPipha Angkor
Model គង់ សោមា
Makeup Nakeo Ampha
Dress-up Nara Pich
Mirror Studio

លោកជំទាវ ម៉ៅ ម៉ាល័យ កែគឹមយ៉ាន គោរពវិញ្ញាណក្ខន្ធ សម្ដេចព្រះរាមបុប្ផាទេវី

សំណព្វ — Sun, 24 Nov 2019 09:25:49 +0000

យោងតាមការបង្ហោះលើផេកផ្លូវការរបស់ក្រុមការងារ លោកជំទាវ ម៉ៅ ម៉ាល័យ កែគឹមយ៉ាន បានសរសេរថា” នៅថ្ងៃទី២៤ ខែវិច្ឆិកា ឆ្នាំ ២០១៩ លោកជំទាវ ម៉ៅ ម៉ាល័យ កែគឹមយ៉ាន និងក្រុមការងារ បានអញ្ជើញថ្វាយនូវកម្រងផ្កា ដល់ព្រះបរមសព សម្តេចរាជបុត្រី ព្រះរៀម នរោត្តម បុប្ផាទេវី ទេពនាថវដ្តីឯក និង ជាឧត្តមក្រុមប្រឹក្សាព្រះមហាក្សត្រ សមាជិកាក្រុមប្រឹក្សាធម្មនុញ និងជាអតីតរដ្ឋមន្ត្រីក្រសួងវប្បធម៌និងវិចិត្រសិល្បៈ ដែលទ្រង់សោយព្រះទីវង្គត នៅថ្ងៃចន្ទ ៧រោច ខែកក្តិក ឆ្នាំកុរ ឯកស័កពុទ្ធសករាជ ២៥៦៣ ត្រូវនិងថ្ងៃទី១៨ ខែវិច្ឆិកា ឆ្នាំ២០១៩ វេលាម៉ោង ១២:៣០នាទី ក្នុងជន្មាយុ ៧៧ ព្រះវស្សា ដោយរោគាពាធ។
សូមវន្ទាឧទ្ទិសដល់ដួងព្រះវិញ្ញាណក្ខន្ធ សម្ដេចព្រះរាជបុត្រី ព្រះរៀម នរោត្ដម បុប្ផាទេវីទ្រង់យាងយោនយកកំណើតបដិសន្ធិក្នុងសុគតិភពគ្រប់ៗជាតិកុំបីឃ្លៀងឃ្លាតឡើយ”។

ខាងក្រោមនេះជារូបភាពខ្លះៗ របស់លោកជំទាវ ម៉ៅ ម៉ាល័យ កែគឹមយ៉ាន ក្នុងពិធីចូលគោរពព្រះវិញ្ញាណក្ខន្ធ សម្ដេចព្រះរាម បុប្ផាទេវី មុននេះ៖

គ្រួសារតារាកម្ពុជា និង សិល្បករ ចូលរួមគោរពវិញ្ញាណក្ខន្ធ សម្ដេចព្រះរាម នរោត្តម បុប្ផាទេវី

សំណព្វ — Fri, 22 Nov 2019 03:04:29 +0000

មិនខុសពីឥស្សរជនល្បីៗក្នុងព្រះរាជាណាចក្រកម្ពុជា ដែលបណ្ដាក់គ្នាទៅអុជធូប គោរពវិញ្ញាណក្ខន្ធ សម្ដេចព្រះរាម នរោត្តម បុប្ផាទេវី កាលពីថ្ងៃទី២១ វិច្ឆិកា ឆ្នាំ២០១៩ ក្រុមតារាសិល្បៈជាច្រើន ដែលរួមមានសិល្បករពីគ្រួសារតារាកម្ពុជាផង ក៏បានចូលរួមគោរពព្រះសពព្រះអង្គ ប្រកបដោយអារម្មណ៍ក្ដុកក្ដូលផងដែរ។

វត្តមានសិល្បករយ៉ាងច្រើនកុះករ នៅក្នុងថ្ងៃនោះ រួមមាន លោក សុះ ម៉ាច តារាចម្រៀងជើងចាស់, លោក ផាត់ តារារដ្ឋ ស្ថាបនិកគ្រួសារតារាកម្ពុជា, អ្នកស្រី សរ កេសារ៉ា ម្ចាស់ផលិតកម្មកេសារ៉សាភាពយន្ត, អ្នកស្រី ថុង ស៊ីវទៀង ម្ចាស់ផលិតកម្មចក្រវាទ្បពេជ្រភាពយន្ត, អ្នកអង្គម្ចាស់ ស៊ីសុវត្ថិ សិរីវុឌ អ្នកនិពន្ធ, អ្នកនាង យុគ ចិន្តា, លោក កុយ ស៊ីឌឿន ប្រធានក្លិបសិល្បៈឌីភី, អ្នកនាង ព្រំ រដ្ឋា, អ្នកអង្គម្ចាស់ ស៊ីសុវត្ថិ ឯលរ៉ូរាឌ តារាសម្ដែង, លោក វណ្ណាឌី តារាសម្ដែង, លោក កុល សុភោ, ក្រុមសិល្បៈហ្វូណន, និងតារាសិល្បៈ ចាស់ក្មេងជាច្រើនរូបទៀត។

នេះជាការចូលរួមរបស់តារាសិល្បៈ ក្នុងការរំលែកទុក្ខដ៏មហាក្រៀមក្រំ របស់ព្រះរាជវង្ស និងព្រះញាតិវង្សខ្មែរ ដែលបាត់បង់សម្ដេចព្រះរាម ដែលជាមរតករស់ដ៏អស្ចារ្យ នៃរបាំព្រះរាជទ្រព្យដ៏មានតម្លៃ។

រដ្ឋាភិបាលសម្រេចយកថ្ងៃទី២០ វិច្ឆិកា កាន់ទុក្ខព្រះរាជបុត្រីព្រះរៀម បុប្ផាទេវី ទូទាំងប្រទេស

សំណព្វ — Tue, 19 Nov 2019 00:57:08 +0000

សម្តេចតេជោនាយករដ្ឋមន្ត្រី បានកំណត់យកថ្ងៃទី ២០ វិច្ឆិកា ឆ្នាំ២០១៩ ជាថ្ងៃគោរពវិញ្ញាណក្ខន្ធរបស់ព្រះអង្គម្ចាស់ក្សត្រីយ៍ព្រះរៀម បុប្ផាទេវី ហើយក៏បានប្រកាសអោយគ្រប់ក្រសួងស្ថាប័នទាំងអស់ និងប្រជាពលរដ្ឋ ត្រូវចូលរួមគោរពវិញ្ញាណក្ខន្ធរបស់ទ្រង់ ដោយត្រូវទម្លាក់ទង់ជាតិត្រឹមពាក់កណ្តាលដង ដើម្បីធ្វើពិធីកាន់ទុក្ខក្នុងរយៈពេល ១ថ្ងៃ។

ការថ្លែងនេះ គឺនៅពេលដែលសម្ដេច ហ៊ុន សែនអញ្ជើញសំណេះសំណាលជាមួយប្រតិភូកីឡាកម្ពុជា ចូលរួមការប្រកួតកីឡា SEA Games លើកទី៣០ នៅប្រទេសហ្វីលីពីន។ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជណាច្រកម្ពុជា បានមានប្រសាសន៍ថ្វាយនូវការចូលរួមរំលែកទុក្ខ ជាមួយព្រះមហាក្សត្រីវររាជមាតាជាតិខ្មែរ នរោត្តម មុនីនាថ សីហនុ ចំពោះការបាត់បង់ព្រះរាជបុត្រីច្បង គឺសម្តេចរាជបុត្រីព្រះរាម នរោត្តម បុប្ផាទេវី។ សម្ដេចថា ពិតជាមានការសោកស្តាយ ចំពោះការបាត់បង់ទ្រង់ដ៏ធំធេងសម្រាប់ជាតិ និងប្រជាពលរដ្ឋរបស់យើង ពីព្រោះព្រះអង្គបានចូលរួមកិច្ចការងារជាច្រើនក្នុងសង្គម ជាពិសេសការលើកតម្កើងតម្លៃសិល្បៈវប្បធម៌ខ្មែរ ហើយព្រះអង្គក៏ជាសមាជិកក្រុមប្រឹក្សាធម្មនុញ្ញផងដែរ។

គួរបញ្ជាក់ថាសម្ដេចរាជបុត្រីព្រះរៀម នរោត្តម បុប្ផាទេវី បានយាងសោយព្រះពិរាល័យ( សោយទិវង្គត់) កាលពីវេលាម៉ោង១២:៣០នាទីថ្ងៃត្រង់ នាថ្ងៃទី១៨ ខែវិច្ឆិកា ឆ្នាំ ២០១៩ ដោយរោគាពាធ ក្នុងព្រះជន្មាយុ ៧៦ ព្រះវស្សា នៅមន្ទីរពេទ្យមួយក្នុងប្រទេសថៃ។

ព្រះនិមិត្តរូបរបាំព្រះរាជទ្រព្យ សម្ដេចព្រះរាជបុត្រី បុប្ផាទេវី សោយទីវង្គត

សំណព្វ — Mon, 18 Nov 2019 07:20:12 +0000

យោងតាមផេកផ្លូវការព្រះបរមរាជវាំង បានសរសេរបង្ហោះថា”សូមថ្វាយមហាព្រះរាជកុសល ថ្វាយព្រះវិញ្ញណក្ខ័ន្ធ សម្ដេចរាជបុត្រី ព្រះរៀម នរោត្តម បុប្ផាទេវី ស្តេចយាងទៅកាន់ទីឋានព្រះបរមសុខកុំបីឃ្លៀងឃ្លាតឡើយ។

សម្ដេចរាជបុត្រី ព្រះរៀម នរោត្តម បុប្ផាទេវី បានយាងសោយព្រះពិរាល័យ(សោយទីវង្គត)ក្នុងព្រះជន្ម ៧៦ព្រះវស្សា នាវេលាម៉ោង ១២:៣០ នាទី ថ្ងៃទី១៨ ខែវិច្ឆិកា ឆ្នាំ២០១៩ ក្នុងមន្ទីរពេទ្យព្រះរាជាណាចក្រថៃ ដោយជរាពាធ។ ព្រះអង្គ ព្រះប្រសូតនៅថ្ងៃទី០៨ ខែមករា ឆ្នាំ១៩៤៣ នារាជធានីភ្នំពេញ ទ្រង់ជាព្រះរាជបុត្រីច្បង នៃព្រះករុណា ព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពដែនដី និងឯកភាពជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត និងអ្នកម្នាង ផាត់ កាញ៉ុល នាដការី នៃរបាំព្រះរាជទ្រព្យ”។

នេះជាមហាទុក្ខសោកដ៏ក្រៀមក្រំ ដែលធ្វើអោយមហាជនខ្មែរជាកូនជាចៅ សោកសង្រេងក្រៃលែង ជាពិសេសគឺនឹកស្រណោះដល់ស្នាដៃព្រះអង្គដែលបានលើកស្ទួយសិល្បៈបុរាណខ្មែរទាំងកម្លាំងព្រះកាយ និង ព្រោះហរទ័យកន្លងមក។

សូមបញ្ជាក់ថា សម្តេចរាជបុត្រី ព្រះរៀម នរោត្តម បុប្ផាទេវី ទេពនាថវដ្តីឯក គឺជាព្រះនិមិត្តរូប នៃរបាំព្រះរាជទ្រព្យខ្មែរ ពីព្រោះតែកាលពីអតីតកាល ក៏ដូចជាបច្ចុប្បន្ន ប្រជាជនខ្មែរដែលស្គាល់ ឬឮឈ្មោះរបាំព្រះរាជទ្រព្យ តែងតែនឹកឃើញជានិច្ចដល់ព្រះនាមរបស់ទ្រង់ ដែលជាអ្នកសម្តែងរបាំដ៏ប៉ិនប្រសប់នេះ រួមជាមួយសម្រស់ដ៏ស្រស់សោភា។ ទោះបីជាបច្ចុប្បន្ន ព្រះអង្គ មានព្រះជន្ម ៧៦ព្រះវស្សា និងឈប់សម្តែងក្តី ក៏ទ្រង់នៅតែបន្តរៀបចំក្រុមសម្តែងរបាំព្រះរាជទ្រព្យ ដើម្បីផ្សព្វផ្សាយឲ្យយុវជនជំនាន់ក្រោយបានដឹង និងជាពិសេសផ្សព្វផ្សាយនៅលើឆាកអន្តរជាតិ។