នាយទុយ – ផ្ទះតារា – PHTEASDARA

នាយទុយ បើកហាងស៊ុប ដើមទុនញាក់សាច់

សំណព្វ — Fri, 01 Dec 2023 14:48:35 +0000

កាលពីថ្ងៃទី១ ធ្នូ ឆ្នាំ២០២៣ អតីតពិធីករល្បីឈ្មោះ លោក អ៉ឹង រដ្ឋា ហៅទុយ បានបើកបង្ហាញភោជនីយដ្ឋានយ៉ាងធំដុំ យីហោ ស៊ីនីវនីវ នៅកែងស្ដុបព្រឹទ្ធសភា ក្បែរស្ដុបបូកគោ ដោយមានវត្តមានសិល្បករមួយចំនួនចូលរួម។

នេះជាហាងស៊ុបស៊ីឈ័ន ដែលកំពុងនិយម ដោយនាយទុយ គឺជាម្ចាស់អាជីវកម្មផ្ទាល់តែម្ដង ។ អ្វីដែលគួរកត់សម្គាល់ គឺតម្លៃហូបមួយឆ្អែត ក្នុងតម្លៃតែ៨.៨ដុល្លារតែប៉ុណ្ណោះ ខណៈឈុតពិសេសគឺតម្លៃមួយឆ្អែតតែ១២ដុល្លារ។

នាយទុយ ដែលជាម្ចាស់ហាងបានលើកឡើង តម្លៃដែលបានកំណត់ ភ្ញៀវទាំងអស់ក៏អាចហូបស្រាប៊ៀ ដោយឥតកំណត់ ក្នុងតម្លៃខាងលើផងដែរ ទើបភោជនីយដ្ឋាននេះមានភ្ញៀវកកកុញតាំងពីថ្ងៃបើកសម្ពោធ។ ហាងនេះក៏មានកន្លែងក្មេងលេង និង សមស្របសម្រាប់ពិធីខួបកំណើត និង ជប់លៀងផងដែរ ពិសេសគឺទីតាំង សម្រាប់ចតឡានតែម្ដង។

ញាក់ខ្លាំង ការពិត Club M1 ដែលទើបបើកសម្ពោធ ជាជំនួញរបស់ នាយទុយ

សំណព្វ — Wed, 05 Jul 2023 09:52:10 +0000

អាចរាប់ថា កាន់តែជោគជ័យពីមួយជំហានទៅមួយជំហាន ដែល អតីតពិធីករល្បីល្បាញ លោក អុឹង រដ្ឋា ហៅទុយ អាចបើកសម្ពោធក្លិបកម្សាន្តមួយកន្លែងថ្មីទៀត បន្ទាប់ពីលោកទើបតែត្រូវគេដឹងថា បានក្លាយជាម្ចាស់ក្លិបឈ្មោះ S1 ដែលបោះទុនដល់ទៅរង្វង់៥លានដុល្លារ នៅក្បែរកោះពេជ្រ។ អ្នកកៀកកិតនឹងលោកច្រើនណាស់ សរសើរថា លោកកំពុងជោគជ័យ ខណៈដែលតារាសិល្បៈរូបនេះ ក៏អាចធ្វើអោយក្លិប S1 នៅក្បែរស្ពានហង្សកោះពេជ្រ ក្លាយជាក្លិបកម្សាន្តដ៏ពេញនិយម ដែលជំរុញអោយដៃគូភាគហ៊ុនទាំងអស់ បន្តចាប់ដៃ ហើយធ្វើអោយលោកអាចក្លាយជាម្ចាស់ក្លិបមួយទៀត គឺក្លិប M1។

ក្លិបកម្សាន្តថ្មីនេះ នាយទុយ បានបើកសម្ពោធយ៉ាងអធឹកអធម កាលពីថ្ងៃទី១ កក្កដា ហើយបើគ្មានការបង្ហោះរូបពីពិធីបើកសម្ពោធនោះទេ ក៏ប្រហែលជាគ្មានអ្នកដឹងនោះដែរ ថា នាយទុយ គឺជាម្ចាស់មួយចំណែក ដែលមាននាទីគ្រប់គ្រង និង មើលខុសត្រូវ លើក្លិបនេះទាំងមូល។ តារាសិល្បៈ ដែលបានដឹងពីរឿងមួយនេះ បានលាន់មាត់សរសើរ ថា នាយទុយ ដ្បិតថា ស្ងប់ស្ងាត់ពីសិល្បៈ តែលោកកំពុងកាក់កបយ៉ាងខ្លាំង ក្នុងជំនាញបង្កើតក្លិប និង គ្រប់គ្រងក្លិបកម្សាន្ត ដែលការងារមួយនេះ កំពុងធ្វើអោយលោកក្លាយជាអ្នកសិល្បៈដែលមានឱកាសក្ដាប់លុយរាប់ម៉ឺន និង ក្លាយជាអ្នកដែលមានជំនួញធំដុំក្នុងដៃ។

ក្លិបកម្សាន្តមួយនេះ ក៏មានន័យថា នាយទុយមានជំនួញបើកក្លិបដល់ទៅ២កន្លែងហើយក្នុងដៃ ខណៈដែលក្លិប S1 របស់លោក ត្រូវគេដឹងថា មានតម្លៃជាង៥លានដុល្លារ ហើយក្លិបថ្មីដែលទើបដំណើរការនេះ ក៏មានតម្លៃប្រហែលៗនឹងខ្ទង់លានដុល្លារដែរ ដោយសារតែរៀបចំប្រព័ន្ធភ្លើង ភ្លេង ឡើងញាក់ មិនចាញ់ក្លិប S1 ដែលជាលំដាប់ក្លិបហាយសូរ។

នាយទុយ បានបង្ហោះនៅលើបណ្ដាញសង្គមថា ដើម្បីអបអរវត្តមានក្លិបថ្មី នៅក្បែរវត្តនាគវ័ន្តនេះ លោកនឹងមានបញ្ចុះតម្លៃរហូតដល់៥០ភាគរយ ដោយមិនកំណត់កាលបរិច្ឆេទ ហើយលោកក៏ប្រកាសថា នឹងអញ្ជើញតារាចម្រៀងល្បីៗ អោយទៅច្រៀងរាំ ដើម្បីទាក់ទាញ នៅថ្ងៃចុងសប្ដាហ៍ និង ថ្ងៃពិសេសផងដែរ ទើបកាន់តែធ្វើអោយគេមើលឃើញថា នាយទុយ គឺពិតជាមានយុទ្ធសាស្ត្រគ្រប់គ្រងក្លិបបានខ្លាំង ដែលធ្វើអោយក្លិបដែលលោកបង្កើត និង កាន់កាប់នីមួយៗ ទទួលបានភាពរីកចំរើន។ តាមគម្រោងលោក ក៏គ្រោងបង្កើតសាខាបន្តបន្ទាប់ផងដែរ បន្ទាប់ពីក្លិប M1 នឹងមានលំនឹងជោគជ័យ ដូចគ្នានឹងក្លិប S1។

អ្នកណាមិនភ្ញាក់ នៅពេលដឹងថា នាយទុយ ក្លាយជាថៅកែក្លឹប តម្លៃជាង៥លានដុល្លារ

សំណព្វ — Fri, 12 May 2023 13:19:41 +0000

ស្ទើរតែលាន់មាត់ គ្រប់ស្រទាប់មហាជន ជាពិសេសចង្កោមអ្នកសិល្បៈ នៅពេលដឹងថា អតីតពិធីករល្បីឈ្មោះ លោក អ៉ឹង រដ្ឋា ហៅទុយ គឺជាម្ចាស់ក្លិបថ្មីមួយ យីហោ S1 Club ដែលត្រូវគេដឹងថា បានបោះទុនរហូតដល់៥លានដុល្លារ ខណៈដែលដំណឹងនេះ កំពុងធ្វើអោយនាយទុយក្លាយជាសិល្បៈស៊េរីចាស់ ដែលជោគជ័យមិនធម្មតា ក្រោយពេលលោកស្ងាត់ពីការងារសិល្បៈ។ ការទម្លាយចេញនេះ គឺបន្ទាប់ពីលោកទើបតែទទួលបានសញ្ញាប័ត្រអនុបណ្ឌិត និង បន្ទាប់ពីក្នុងអាក់ខោនផ្ទាល់ខ្លួនរបស់លោក ត្រូវបានប្ដូរដាក់ Logo ក្លិប និង មានការទម្លាយពីអ្នកសិល្បៈជាច្រើនថា នាយទុយ គឺជាភាគហ៊ុនមួយក្នុងក្លិប ដែលមានតម្លៃមិនក្រោម៥លានដុល្លារនេះ។

យោងតាមការទម្លាយពីអ្នកសិល្បៈ ដែលបានចូលរួមក្នុងពិធីបើកសម្ពោធកន្លងទៅ បានអះអាងថា S1 Club ដែលជាក្លិបទំនើបមួយនៅក្បែរស្ពានហង្សកោះពេជ្រ គឺពិតជាមាននាយទុយ ជាម្ចាស់ភាគហ៊ុនមួយពិតប្រាកដមែន ខណៈដែលការគ្រប់គ្រងក្នុងក្លិបទាំងមូល គឺលោកជាអ្នកទទួលខុសត្រូវនោះផង។ បុគ្គលិកគ្រប់ផ្នែកសុទ្ធតែហៅលោកថា ថៅកែៗ ស្របពេលដែលអាជីវកម្មធំដុំនេះ កំពុងជួយលើកមុខលើកមាត់នាយទុយយ៉ាងខ្លាំង ក្រោយពេលលោកក៏រយាលពីការងារជាពិធីករ បើទោះជានៅមានឈ្មោះជាបុគ្គលិក CTN។ យ៉ាងណាក៏ដោយ គេនៅមិនទាន់ដឹងថា តើក្លិប S1 ដែលត្រូវគេសរសើរថា បានប្រើប្រព័ន្ធភ្លើង និង Sound កម្រិតអន្តរជាតិចុងក្រោយ និង ការសាងសង់ អស់ប្រមាណ៥លានដុល្លារនេះ គឺមានភាគហ៊ុនរបស់លោកប៉ុន្មានភាគរយនោះទេ តែតាមរយៈការបញ្ជាក់ថា លោកជាម្ចាស់ភាគហ៊ុនមួយ គឺទោះជាប៉ុន្មានភាគរយក៏ដោយ ក៏ជាជោគជ័យមិនធម្មតាផងដែរ ដោយសារតែ S1 Club ដែលជាក្លិបលំដាប់អភិជននេះ បោះទុនកប់ពពក និង កំពុងក្លាយជាក្លិបដ៏ពេញនិយម ដែលគេមិននឹកស្មានថា មានភាគហ៊ុនមួយ របស់អតីតពិធីករបាត់មុខរូបនេះ។

មកទល់ពេលនេះ S1 Club របស់លោក បានបើកដំណើរការហើយ តាំងពីដើមខែឧសភា ដោយតារាសិល្បៈច្រើនណាស់ បង្ហាញមុខចេញចូល ខណៈដែលនាយទុយ ក្រោយពីក្លាយជាថៅកែ ក៏នៅតែដាក់ខ្លួន និង ជិតស្និទ្ធជាមួយអ្នកសិល្បៈទាំងនោះយ៉ាងជិតស្និទ្ធិ ធ្វើអោយម្នាក់ៗកោតសរសើរពីសំណាងរបស់លោក។ នាយទុយ ក៏ត្រូវគេអះអាងថា មានគម្រោងពង្រីកសាខាក្លិបនេះបន្ថែមទៀត ដើម្បីពង្រឹងអាជីវកម្មបើកក្លិបនៅពេលបន្តបន្ទាប់ផងដែរ។

ទម្លាយភាពស្និទស្នាលរវាងប្អូនពៅ នាយទុយ និង ឌួង ហ្សូរីដា

សំណព្វ — Sat, 02 Jan 2021 06:02:46 +0000

ស្ទើរតែគ្រប់សកម្មភាពទៅណាមកណារបស់ អតីតពិធីការិនី កញ្ញា ឌួង ហ្សូរីដា គេឃើញក្មេងកំលោះម្នាក់ ដែលជាប្អូនបង្កើតរបស់ លោក អ៉ឹង រដ្ឋា ហៅទុយ ដើរអមដំណើរយ៉ាងជិតស្និទ្ធិ រហូតត្រូវបានអ្នកខ្លះសង្ស័យថាមានទំនាក់ទំនងមិនធម្មតាជាមួយនាង។ ជាក់ស្ដែងក្នងដំណើរកម្សាន្តរបស់នាង និង គ្រួសារ នៅកោះរ៉ុងសន្លឹម ក៏ឃើញបុរសសង្សារម្នាក់នេះ ទៅជាមួយផងដែរ ខណៈដែលអ្នកទាំងពីរក៏បង្ហោះរូបធ្វើអោយអ្នកខ្លះយល់ច្រលំ។

ជាមួយនឹងរូបថតជាច្រើនសន្លឹក ដែលគេតែងតែឃើញប្អូនប្រុសរបស់នាយទុយ ជាមួយនឹង ឌួង ហ្សូរីដា នេះ នាងបានចេញមុខបញ្ជាក់ថា ការពិតហេតុផលដែលនាងទៅណាមកណា ឬ ក៏ធ្វើអ្វីក៏មិនដែលចោល ប្អូនពៅរបស់នាយទុយម្នាក់នេះ គឺដោយសារតែហេតុផលថា ប្អូនប្រុសនាយទុយរូបនេះ គឺជាអ្នកឯកទេសផ្នែកផាត់មុខ សាក់ចិញ្ចើម និងធ្វើសក់ដ៏ជំនាញ ដែលជួយអោយនាងស្រស់ស្អាត ត្រូវតាមបរិយាកាស និង សំលៀកបំពាក់ប៉ុណ្ណោះ។ កញ្ញាថា អ្នកផាត់មុខ និង ធ្វើសក់អោយខ្លួនកន្លងមកសុទ្ធតែជំនាញ និង ប៉ិនប្រសព្វ ប៉ុន្តែមកពីក្រោយទទួលបានការផាត់មុខ និង ធ្វើសក់ពីប្រុសក្មេងម្នាក់នេះ ស្រាប់តែពេញចិត្តខ្លាំង ទើបស្រលាញ់រាប់អាន ហើយចាត់ទុកជាប្អូនផង និង ជាជាងប្រចាំផង គ្រប់ពេលនាងទទួលកម្មវិធី ឬ ទៅថតរូបនៅកន្លែងណាៗតែម្ដង។

ឌួង ហ្សូរីដា បន្តថា លោកគឺជាប្អូនប្រុសពៅរបស់ លោក អ៉ឹង រដ្ឋា ហៅទុយ បន្ទាប់ពីកញ្ញា អ៉ឹង និមល ដោយមានជំនាញផាត់មុខ សាក់ចិញ្ចើម និង ធ្វើសក់យ៉ាងជំនាញ ដោយនាងមានអ្នកចង់ផាត់មុខប្រចាំអោយមិនតិចទេ ប៉ុន្តែនៅតែសុខចិត្តជ្រើសយកបុរសម្នាក់នេះ ព្រោះតែពេញចិត្តជាងគេនឹងថ្វីដៃសាក់ចិញ្ចើម តាមទម្រង់មុខ។ លោកមានឈ្មោះថា អ៉ឹង វឌ្ឍនា ហៅ ហួត ឬ នុយ ដោយលោកគឺជាប្អូនពៅរបស់នាយទុយ ហើយក៏មាននិស្ស័យប្រឡូកសិល្បៈខ្លះៗផងដែរ ប៉ុន្តែមកពីរវល់នឹងជំនាញ Make Up ពេក ទើបមិនដើរតាមគន្លងបងៗ។ ជាមួយនឹងការបញ្ជាក់នេះ ទើបធ្វើអោយគេលែងយល់ច្រលំអំពីទំនាក់ទំនងរបស់អ្នកទាំងពីរ បន្ទាប់ពីទៅណាមកណាកម្របាត់គ្នា នៅគ្រប់កម្មវិធីនោះ៕