មិនមែនជារឿងចៃដន្យទេ ដែលកីឡាការិនី ដណ្ដើមបានជ័យជម្នះជូនជាតិ និងរក្សាបានក្រេឌីតជាម្ចាស់មេដាយមាសពិភពលោក ដែលធ្លាប់ទទួលបាន។ អ្នកស្រីត្រូវបានគេចាត់ទុកថា ជាអាយដលដែលនៅតែដណ្ដើមបានកិត្តិយសក្នុងវិស័យកីឡា ដែលពិបាករកអ្នកមកស្នងជំនួសមិនបាន។
យោងតាមការបង្ហោះពីផេកសម្ដេចនាយករដ្ឋមន្ត្រី បានសរសេរថា”សូមអបអរសាទរ វីរកីឡាការិនី កែ ឡេង ដែលបានការពារមេដាយមាសពិភពលោកជាលើកទី៣ ដោយបានផ្ដួលកីឡាការិនីឡាវ Bivilak Thepphakan ដោយលទ្ធផល ៣៦-២២ពិន្ទុ ក្នុងវគ្គផ្ដាច់ព្រ័ត្រនៅក្នុងការប្រកួតកីឡាប៉េតង់ជើងឯក ពិភពលោកយុវជន និងស្ដ្រី លើកទី១៧ លើវិញ្ញាសាវាយយកពិន្ទុ(Shooting) នារសៀល ថ្ងៃសុក្រ ទី២២ ខែវិច្ឆិកា ២០១៩ នៅពហុកីឡដ្ឋានជាតិ រាជធានីភ្នំពេញ។
នេះជាកិត្តិយស និងជាមោទនភាពជាតិ ដែលវីរកីឡាការិនី កែ ឡេង ដណ្ដើមបានមេដាយមាសពិភពលោក ជាលើកទី ៤ ជាប់ៗគ្នា ខណៈមិនទាន់មានកីឡាការិនីប្រទេសណាអាចធ្វើបានដូចកម្ពុជាឡើយ។
ចំពោះមេដាយមាសពិភពលោក អមជាមួយកំណត់ត្រាប្រវត្តិសាស្ដ្រដ៏កម្រនេះ គឺស្របពេលដែលប្រទេសកម្ពុជា ទទួលបានសិទ្ធធ្វើជាម្ចាស់ផ្ទះលើកដំបូង ក្នុងការប្រកួតកីឡាប៉េតង់ជើងឯកពិភពលោកយុវជន និងស្ដ្រី លើកទី១៧ ហើយ ៣លើកមុន ដែលអ្នកស្រី កែ ឡេង ដណ្ដើមបាន គឺកាលពីឆ្នាំ២០១៣ នៅប្រទេសបារាំង, ឆ្នាំ ២០១៥ នៅប្រទេសថៃ និងឆ្នាំ២០១៧ នៅប្រទេសចិន។
អរគុណបងប្អូនជនរួមជាតិដែលបានចូលរួមទស្សនា គាំទ្រ និងលើកតម្កើងវិស័យកីឡាជាតិរបស់យើង”។ ជាមួយនឹងការបង្ហោះលើផេកសម្ដេច ក៏មានការអបអរពីមហាជនទូទាំងប្រទេសយ៉ាងកក្រើក អមដោយពាក្យសរសើរថា ពិតជាអាយដលតែមួយគ្មាន២ មិនធម្មតា។
