ករណីកើនឡើងនៃករណីរំលោភសិទ្ធិមនុស្សនៅខេត្តព្រះសីហនុនៃប្រទេសកម្ពុជា បានបង្កើនការព្រួយបារម្ភដល់អ្នកសង្កេតការណ៍ អំពីការលេចចេញនូវឧក្រិដ្ឋកម្ម ដែលបានរៀបចំឡើងនៅក្នុងប្រទេសបន្ទាប់ពីមានរបាយការណ៍អំពីការរីករាលដាលនៃការរំលោភបំពានការងារធ្ងន់ធ្ងរនៅក្នុងគម្រោងវិនិយោគរបស់ក្រុមហ៊ុនបរទេសនៅខេត្តព្រះសីហនុ។
បញ្ហានេះបានជំរុញឱ្យអ្នកឯកទេសដាក់ចេញនូវសេចក្តីប្រកាសដល់ប្រជាជនខ្មែរ ជាពិសេសយុវជនដែលកំពុងស្វែងរកការងារធ្វើត្រូវពិនិត្យដោយប្រុងប្រយ័ត្ននូវល័ក្ខខ័ណ្ឌនៃការងារដើម្បីធានាថាក្រុមហ៊ុននោះអនុវត្តបានត្រឹមត្រូវតាមច្បាប់របស់ប្រទេសកម្ពុជា។គួរកត់សម្គាល់ថាការស្លាប់របស់បុគ្គលិកកាស៊ីណូកាលពីពេលថ្មីៗនេះបានបង្ហាញ ពីការរំលោភសិទ្ធិមនុស្សធ្ងន់ធ្ងរ បន្ថែមពីលើការរត់ពន្ធមនុស្សដែលបានកើតមាន ឡើងនាពេលកន្លងមក។
មន្រ្តីមកពីសមាគមដើម្បីសិទ្ធិមនុស្សនិងអភិវឌ្ឍន៍កម្ពុជាបានអះអាងថាការរំលោភបំពានកំពុងកើនឡើងនៅខេត្តព្រះសីហនុបន្ទាប់ពីមានការមកដល់របស់វិនិយោគិនចិននៅក្នុងខេត្តព្រះសីហនុ លោកស្រីក៏បានបន្ថែមថាវិនិយោគិនចិនកំពុងធ្វើអាជីវកម្មល្បែងស៊ីសងខុសច្បាប់ដែលត្រូវបានហាមឃាត់ដោយរដ្ឋាភិបាលនៃប្រទេសកម្ពុជា។
