វាសនាមនុស្សពិតជាមើលមិនឃើញ មិនគ្រាន់តែជោគជ័យក្នុងវិស័យជំនួញ ដើម្បីកែប្រែជីវភាពដែលធ្លាប់តែក្រីក្រកាលពី១២ឆ្នាំមុនប៉ុណ្ណោះទេ តែក៏ត្រូវបានព្រះមហាក្សត្រត្រាស់បង្គាប់ងារជាឧកញ៉ាគួរអោយភ្ញាក់ផ្អើលផងដែរ ដោយសារតែលោកមានស្នាដៃក្នុងការរួមចំណែកអភិវឌ្ឍន៌ជាតិនិង ក្នុងកិច្ចការសប្បុរសធម៌ រាប់មិនអស់ ចាប់តាំងពីលោក្លាយជាអ្នកជំនួញដីធ្លី។ ជោគជ័យរបស់លោក គឺសារធំមួយ ដើម្បីអោយអ្នកមានប្រវត្តិកម្សត់ និងក្រីក្រច្រើនទៀត មានកម្លាំងចិត្តតស៊ូ។
យោងតាមព្រះក្រឹត្សដែលចុះព្រះហត្ថលេខាកាលពីថ្ងៃទី២១ កុម្ភៈ ឆ្នាំ២០២០ មានខ្លឹមសារថា”យើងព្រះករុណាព្រះបាទសម្ដេចព្រះបរមនាថ នរោត្តម សីហមុនី សមានភូមិជាតិសាសនា រក្ខតខត្តិយា ខេមរារជ្ជរាស្ត្រ ពុទ្ធិន្ទ្រាធរាមហាក្សត្រ ខេមរាជនា សមូហោភាស កម្ពុជឯករាជរដ្ឋបូរណសន្តិ សុភមង្គលា សិរីវិបូលា ខេមរាស្រីពិរាស្ត្រ ព្រះចៅក្រុងកម្ពុជាធិបតី(យោងតាមសេចក្ដី ក្រាបបង្គំទូលថ្វាយរបស់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា) ត្រាស់បង្គាប់ ផ្ដល់គោរមងារ លោ យ៉ន សេងហាន ជាឧកញ៉ា។
ជាមួយនឹងព្រះរាជក្រឹត្យ ដែលបានបង្ហោះឡើង គេឃើញកូនសិស្សរបស់លោករាប់រយនាក់បង្ហោះសារអបអរសាទរ។ នេះជាសមិទ្ធិផលធំមួយ ដែលអគ្គនាយកក្រុមហ៊ុន សេងហានរូបនេះ បានទទួល បន្ទាប់ពីហែលឆ្លងពីជីវិតពោរពេញដោយការតស៊ូស្ទើរតែពាក់កណ្ដាលជីវិត ពីអ្នកលក់ស្បែកជើងមុខរោងចក្រ ទៅជាបុគ្គលិកទីផ្សារអោយគេរហូតក្លាយជាម្ចាស់គម្រោងដីធ្លីខ្នាតតូច រហូតដល់ខ្នាតយក្សនាពេលនេះ។
លោក យ៉ន សេងហាន ធ្លាប់បានបញ្ជាក់ថា មុនពេលលោកក្លាយខ្លួនជាអ្នកជំនួញដីធ្លី លោកគ្រាន់តែជាកូនអ្នកក្រ ដែលតស៊ូសិក្សារៀនសូត្របានដល់ចប់ទាំងលំបាកតែប៉ុណ្ណោះ។ ក្រៅពីជោគជ័យក្នុងវិស័យអចលនទ្រព្យទាំងគម្រោងពុះដីឡូតិ៍លក់ និង គម្រោងសាងសង់បុរីលក់ លោក យ៉ន សេងហាន ក៏ជាគ្រូបណ្ដុះបណ្ដាលអាជីវកម្មជោគជ័យដ៏ល្បីឈ្មោះម្នាក់ផងដែរ។ មុនទទួលងារជាឧកញ៉ាប៉ុន្មានថ្ងៃ លោកធ្លាប់បង្ហោះថា ជាមិនគួរអោយជឿទេ ដែលអាពាហ៍ពិពាហ៏កាលពី១២ឆ្នាំ សូម្បីថ្លៃទឹកដោះបង្គាប់១៥០០ដុល្លារ ក៏លោកគ្មានគ្រប់ មានតែ៦០០ដុល្លារ (ជំពាក់គេ៩០០ដុល្លារ) និង មានតែ១០ម៉ឺនរៀលតស៊ូរស់ជាមួយភរិយា ដោយជាប់បំណុលគេជាច្រើន ពីព្រោះតែម្ដាយឪក្មេក យកលុយគេមករៀបការអោយ។ លោកក៌ត្រូវគេស្គាល់ថា គឺជាសប្បុរសជនមួយរូប ដែលតែងតែដឹកនាំក្រុមការងារធ្វើកិច្ចការសង្គមដូចជាចែកអំណោយផ្សេងៗនៅក្នុងសហគមដែលលោកបោះគម្រោងធ្វើអាជីវកម្មពុះដីឡូតិ៍ និងសង់បុរី ជាពិសេសក្នុងទឹកដីខេត្តត្បូងឃ្មុំ និង ខេត្តកំពុងស្ពឺ ខណៈដែលក្រុមហ៊ុនរបស់លោកក៌មានស្នាដៃក្នុងការលើកផ្លូវ ជីកប្រឡាយ និងអភិវឌ្ឍន៏សហគមន៏ជាច្រើន តាំងពីជោគជ័យក្នុងអាជីវកម្មដីធ្លី។
