តារាសម្ដែង និង ពិធីករ លោក អាឡាស្កូ Alasko ត្រូវគេកត់សម្គាល់ថា បានបាត់មុខពីការសិល្បៈមួយរយៈ តែពេលនេះលោកបានត្រលប់មកវិញហើយ ដោយលោកអះអាងថាការងារសិល្បៈមានការកំរើកឡើង ស្របគ្នានឹងការបើកប្រទេសឡើងវិញនោះផង។ លោកក៏ប្រកាសពីការពង្រឹងមុខជំនួញអនឡាញ និង បើកហាងផ្ទាល់ខ្លួន ទន្ទឹមនឹងការទទួលការងារសិល្បៈពេញលេញនេះផងដែរ។
លោក វីជេ អាឡាស្កូ បានថ្លែងប្រាប់”ផ្ទះតារា”ថា មួយរយៈដែលលោកបាត់មុខគឺដោយសារតែលោកយកពេលទៅពង្រឹងអាជីវកម្ម និង មិនចង់ប្រឈមមុខនឹងការបង្ហាញមុខនៅក្នុងជំនួបអ្នកសិល្បៈ ដើម្បីគេចចេញពីសិល្បៈ។ ស្របគ្នាដែលហ្វេសប៊ុកចាស់របស់លោក ក៏ Log In មិនកើត ដែលធ្វើអោយកាត់ផ្ដាច់ទំនាក់ទំនងជាមួយផលិតករ និង អ្នកសិល្បៈផង ក៏សម្ងំបំពេញការងារផ្ទាល់ខ្លួន ហើយមិនស្វះស្វែងទទួលការងារសិល្បៈតែម្ដង។ លោកទើបតែចាប់ផ្ដើមបង្ហាញមុខក្នងជំនួបអ្នកសិល្បៈសាជាថ្មី និង ទទួលការងារសិល្បៈឡើងវិញ កាលពីចុងឆ្នាំ២០២១មុននេះប៉ុណ្ណោះ ដោយគ្រាន់តែប្រកាសទទួលភ្លាម ក៏រវល់នឹងការងារជាពិធីករក្នុងកម្មវិធីសម្ពោធ និង ប្រូម៉ូតផលិតផលផ្សេងៗ ស្ទើររកពេលទំនេរមិនបានតែម្ដង។
ជាក់ស្ដែងតាំងពីដើមឆ្នាំ២០២២ រហូតដល់មុនចូលឆ្នាំខ្មែរ គឺលោកមានគេកក់កម្មវិធីច្រើនរួចទៅហើយ ដោយមិនទាន់រាប់បញ្ចូលការទំនាក់ទំនងអោយលោកឡើងប៉ុស្តិ៍ និង សម្ដែងភាពយន្ត ដែលខ្លះបានទទួលហើយ និង ខ្លះកំពុងជជែកគ្នានោះផង។ លោកថាការបង្ហាញខ្លួនជាថ្មី ហាក់ធ្វើអោយលោកទទួលបានកម្លាំងចិត្តជាងមុន ហើយសន្ទុះជោគជ័យដែលចាប់ផ្ដើមលេចឡើងនេះ ក៏ជួយប៉ះប៉ូវផ្លូវចិត្ត ក្នុងពេលដែលលោកស្មុគស្មាញ ទាំងក្នងវិស័យជំនួញ និង ការបាត់បង់ចំណូលពីសិល្បៈ ក្នុងពេលប្រទេសរងផលប៉ះពាល់ខ្លាំង ព្រោះតែកូវីត១៩ផ្ទុះខ្លាំងផងដែរ៕
