ក្នុងចំណោមអ្នកលើកពានពីការប្រកួតឈុតបុរាណក្នុងព្រឹត្តិការណ៍របស់«គ្រួសារតារាកម្ពុជា»កាលពីថ្ងៃទី៩ កក្កដា ដែលមានរដ្ឋមន្ត្រីក្រសួងព័ត៌មានធ្វើជាគណអធិបតីទាំងអស់ គេកត់សម្គាល់ថាតារាវ័យក្មេង២រូប គឺកញ្ញា ប៊េប៊ី និង លោក រុន ណាកូ គឺជាម្ចាស់ជ័យលាភីដែលទទួលបានការចាប់អារម្មណ៍គួរអោយកត់សម្គាល់ ដោយសារតែអ្នកទាំងពីរសុទ្ធតែបានគ្រងឈុតដែលបានច្នៃថ្មីរបស់ព្រះមហាក្ស័ត្រ និងព្រះក្សត្រីល្បីឈ្មោះក្នុងសម័យរុងរឿងរបស់កម្ពុជាដូចគ្នា ហើយទទួលបានពានជាតារាលេចធ្លោប្រចាំឆ្នាំពីកម្មវិធីដូចគ្នា។ ចំណុចស្រដៀងគ្នាទៅទៀត គឺអ្នកទាំងពីរ សុទ្ធតែបានជួបហេតុភេទចម្លែកស្រដៀងគ្នាមុន និងក្រោយលើកពានដូចគ្នា រហូតដល់ថ្នាក់ធ្វើអោយអ្នកទាំងពីរញញើតនឹងគ្រងឈុតបុរាណបែបនេះសម្រាប់លើកក្រោយ។
លោក រុន ណាកូ និយាយថា មុនគ្រងឈុតព្រះបាទសុរិយវរ្ម័នទី២ ដែលស្រាវជ្រាវ និងច្នៃដោយលោក នូ សុផេន ដើម្បីចូលប្រកួត លោកដឹងច្បាស់ណាស់ថាមិនអាចធ្វើរឿងផ្ដេសផ្ដាស់សូម្បីតែមាត់ប៉ប៉ាច់ប៉ប៉ោចមិនល្អនោះទេ ដើម្បីកុំអោយបារមីរបស់ម្ចាស់ឈុតប្រកែប្រកាន់។ លោកកាន់តែប្រយ័ត្នទៅទៀតក្នុងឥរិយាបទអង្គុយនៅនឹងតុ ទាំងការនិយាយលេងសើច ឬផឹកជល់កែវជាដើម។ ប៉ុន្តែដោយសារតែអ្នកសិល្បៈជល់អោយហូបស្រាខ្លាំងពេក លោកក៏ដាក់មួយក្អឹកក្នុងពេលអង្គុយរង់ចាំការបង្ហាញខ្លួនជាលើកទី២មុនការប្រកាសលទ្ធផល ក៏មានអាការៈរឹតរួតក្បាលដូចត្រូវគេរឹតក្បាលឡើងណែនតែម្ដង ខណៈដែលមកុដដែលលោកបានពាក់គឺរលុង និងត្រូវដាក់កន្សែងនៅខាងក្នុងសោះដើម្បីអោយអាចពាក់កើត។ លោកថាស្ថានភាពបានធ្វើអោយលោកសម្រេចចិត្តដោះមកុដមួយសន្ទុះ ហើយមានគំនិតចង់ឈប់បន្តការប្រកួត ប៉ុន្តែស្ថានការណ៍កាន់តែរឹតរួតក្បាល មិនខុសពីមានអ្វីមកចង់ច្របាច់លលាដ៍របស់លោកបំបែកនោះទេ ស្របគ្នាដែលក្នុងខ្លួនវិញ ក៏មានសភាពដកដង្ហើមលែងចង់ដល់គ្នា ដូចមានអ្នកមកច្របាច់បំពង់ខ្យល់។ យ៉ាងណាមិញ ក្រោយពេលលោកដឹងថាទំនងជាខុសតំណម ហើយបួងសួងសុំអោយម្ចាស់ឈុតមកជួយ និងសុំអោយម្ចាស់ឈុតកុំប្រកាន់ ស្រាប់តែមួយសន្ទុះក្រោយមកក៏ដូចជាត្រូវគេដកពិសចោល ដោយធ្វើអោយលោកស្រួលខ្លួនដូចដើម ហើយអាចបន្តការប្រកួតក្នុងវគ្គទី២។ លោកថាខ្លួនមិនមែនជាមនុស្សអបិយជំនឿទេ ប៉ុន្តែក្រោយជួបហេតុការណ៍ចម្លែកនេះ ធ្វើអោយលោកភ្លឺភ្នែកតែម្ដង ថាឈុតបុរាណរបស់ព្រះមហាក្សត្រខ្មែរកាលពីសម័យអតីតកាល បើទោះជាបានបង្កើតថ្មី ក៏មានបារមីតាមថែ។
លោកកាន់តែមានរឿងព្រឺខ្លួនទៅទៀតនៅពេលគណកម្មការប្រកាសថា លោកបានទទួលពាន«តារាលេចធ្លោប្រចាំឆ្នាំផ្នែកគ្រងឈុតបុរាណស័ក្ដសម»ស្រាប់តែមានអារម្មណ៍ថាដូចជាមានវិញ្ញាណអ្វីម្យ៉ាងនៅក្បែរៗលោក ដែលលោកយល់ថាប្រហែលជាម្ចាស់ឈុតមកអបអរឈុតដែលខ្លួនបានឈ្នះ ប៉ុន្តែសម្រាប់លោក គឺបះរោមដល់ថ្នាក់មកដល់ផ្ទះហើយ ក៏នៅតែព្រឺៗដេកមិនលក់។
ងាកទៅកញ្ញា ប៊េប៊ី វិញ កញ្ញា និយាយមិនខុសគ្នាថា ក្នុងពេលសែនព្រេន មុនពេលគ្រងឈុត«ព្រះនាងឥន្ទ្រទេវី» អ្នកច្នៃម៉ូដអោយ ក៏បានប្រាប់មិននាងនិយាយអ្វីផ្ដេសផ្ដាស់ ឬមានឥរិយាបទមិនសមរម្យ សូម្បីតែដំណើរនោះដែរ ប៉ុន្តែដោយសារតែនាងអង្គុយរង់ចាំការប្រកួតយូរពេក ហើយគ្រាន់តែនិយាយថា ធុញ និង ពិបាកអង្គុយហាស ស្រាប់តែដូចមានស្អីមកធ្វើបាបនាងតែម្ដង ដោយមកុដចាប់ផ្ដើមធ្ងន់ៗទៅៗដូចមានទម្ងន់១០០គីឡូបន្ថែមពីលើ ក្នុងពេលដែលសំលៀកបំពាក់នោះទៀតសោត គឺជាសាច់ក្រណាត់សោះក៏តឹងទៅៗ ដល់ថ្នាក់ដកដង្ហើមមិនចង់រួច។
នាងថាអោយតែថ្ងូរថាពិបាកគឺកាន់តែធ្វើទុក្ខ ហើយគ្រាន់តែនាងនិយាយថាឈប់ប្រកួតហើយព្រោះទ្រាំលែងបាន ក៏រឹតតែដកដង្ហើមលែងចង់កើត និងធ្ងន់ក្បាលដូចទូលដុំថ្ម។ អ្វីដែលជាអច្ឆរិយៈ គឺនាងគ្រាន់តែបិទភ្នែកហើយបួងសួងថា បើឈុតដែលនាងគ្រងនេះ ពិតជាមានបារមីព្រះនាងឥន្ទ្រទេវី មកឃុំគ្រងមែន សូម្បីអោយព្រះនាងឈប់ប្រកាន់ ហើយជួយអោយនាងមានកម្លាំងមានកំហែងឡើងវិញ ដើម្បីបានបន្តការប្រកួតដណ្ដើមយកមុខមាត់ថ្វាយព្រះនាង ស្រាប់តែសភាពធ្វើទុក្ខបាត់ដូចគេបេះ ធ្វើអោយនាងនឹកហើយគឺមិនជឿមិនបាន។
នាងថារឿងមួយដែលនាងព្រឺក្បាលមិនទាន់បាត់ គឺគ្រាន់តែនាងត្រូវបានប្រកាសថាឈ្នះពាន«តារាលេចធ្លោប្រចាំឆ្នាំផ្នែកគ្រងឈុតកម្រក្នុងសម័យបុរាណបានស័ក្ដសម» ហាក់ដូចជាឃើញព្រះនាងឥន្ទ្រទេវី រំលេចខ្លួនមួយភាំង ធ្វើអោយនាងស្រឡាំងកាំងតែម្ដង ខណៈដែលនាងប្រាប់ថានៅពេលជួបហេតុការណ៍នោះហើយ គឺពិតជារអារនឹងការគ្រងឈុតបុរាណបែបនេះលើកក្រោយ៕
