ខណៈដែលបងប្អូនខ្មែរ នៅក្នុងប្រទេសកម្ពុជា កំពុងសប្បាយក្នុងការរៀបចំព្រឹត្តិការណ៍សង្ក្រាន្ត ដើម្បីអបអរពិធីបុណ្យចូលឆ្នាំខ្មែរ នៅតាមបណ្ដាវិទ្យាល័យ និង ខេត្តក្រុងនានា នៅក្នុងប្រទេសជប៉ុនឯណោះវិញ ក៏មានការជួបជុំ និង រៀបចំពិធីសង្ក្រាន្តយ៉ាងកក្រើកផងដែរ ដោយមានការចូលរួមពីសំណាក់បងប្អូនខ្មែរមកពីគ្រប់ទិសទីរហូតដល់ប្រមាណ២ពាន់នាក់យ៉ាងអឹកអធឹក។
ក្នុងចំណោមសង្ក្រាន្តតូចធំដែលបានធ្វើឡើងជាហូរហែរ នៅក្នុងប្រទេសជប៉ុន គេឃើញសង្ក្រាន្តកូនខ្មែរ នៅខេត្ត Gifu កាលពីថ្ងៃទី៣០ មីនា ឆ្នាំ២០២៥ គឺជាសង្ក្រាន្តដែលមានទ្រង់ទ្រាយធំ ដោយសារតែមានការជួបជុំពីសំណាក់ពលករ និង បងប្អូនខ្មែរ ដែលរស់នៅជប៉ុនរហូតដល់២ពាន់នាក់។ សង្ក្រាន្តកូនខ្មែរនៅខេត្ត Gifu នេះ បានប្រារព្ធឡើងយ៉ាងកងរំពង ដោយមានការសម្ដែងរបាំត្រុដិ ការច្រៀងរាំចង្វាក់ខ្មែរ និង ការលក់ដូរម្ហូបខ្មែរ ដែលជាព្រឹត្តិការណ៍កម្រនៅក្នុងប្រទេសជប៉ុន។
លោក Bro Kheang ដែលជាអ្នករៀបចំមួយរូប ក្នុងចំណោមពលករខ្មែរ ដែលបានផ្ដើមអោយមានព្រឹត្តិការណ៍នេះឡើង បានថ្លែងប្រាប់ផ្ទះតារា ដែលបានទៅផ្ដិតយកទិដ្ឋភាពដោយផ្ទាល់នៅទីនោះថា ការជួបជុំនៅក្នុងប្រទេសជប៉ុន មិនងាយនឹងអាចធ្វើបាននោះទេ ជាពិសេសសម្រាប់ការប្រារព្ធពិធីបុណ្យចូលឆ្នាំខ្មែរ ដែលមានការប្រគំតន្ត្រី និង ច្រៀងរាំកងរំពងបែបនេះ។
នៅប្រទេសជប៉ុន សម្រាប់ការជួបជុំសប្បាយៗ ភាគីជប៉ុនអនុញ្ញាតិអោយតែរៀបចំឡើងក្នុង Hall ដែលអាចផ្ទុកមនុស្សបានតែ៣០០ ទៅ៤០០នាក់ប៉ុណ្ណោះ ដោយសារតែអាជ្ញាធរជប៉ុន បារម្ភខ្លាចបង្កអោយលាន់សំលេងដល់ខាងក្រៅ ឬ មានករណីវាយតប់គ្នា ហើយពិបាករក្សាសុខសុវត្ថិភាព។
ក្មុងនោះបញ្ហារក្សាអនាម័យ និង ការខូចខាតសួនសារធារណៈក្រោយបញ្ចប់ការជួបជុំ ក៏ជាក្ដីបារម្ភរបស់អាជ្ញាធរជប៉ុនផងដែរ ទើបការសុំច្បាប់ដើម្បីរៀបចំការជួបជុំ ដែលមានទ្រង់ទ្រាយធំដល់រាប់ពាន់បែបនេះ គឺមិនមែនជារឿងស្រួល។ ដូច្នេះហើយទើបលោក និង ក្រុមស្ថាបនិកទាំងអស់ ចាត់ទុកថាការរៀបចំព្រឹត្តិការណ៍សង្ក្រាន្តដែលទើបបញ្ចប់កាលពីថ្ងៃទី៣០ មីនា មុននេះ គឺជាជោគជ័យដ៏ធំ ដោយសារតែអាចបង្កើតកម្មវិធីសប្បាយៗ ហើយមានពលកររហូតដល់មិនក្រោម២ពាក់ មកជួបជុំគ្មាប្រារព្ធពិធីសង្ក្រាន្តចូលឆ្នាំខ្មែរ នៅលើទឹកដីប្រទេសជប៉ុន។
ប្រសិនបើគ្មានការរំខានដោយអាកាសធាតុត្រជាក់ខ្លាំង កម្មវិធីជួបជុំផ្សព្វផ្សាយវប្បធម៌ និង ច្រៀងរាំយ៉ាងសប្បាយក្នុងឱកាសធ្វើសង្ក្រាន្តនោះ នឹងមានបងប្អូនពលករខ្មែរ ចូលរួមច្រើនជាងនេះទៅទៀត។
លោកស្រី ឆោម ស្រស់ ប្រធានសមាគមរួបរួមពលរដ្ឋកម្ពុជា ជប៉ុន ដែលជាដៃគូសហការ និង ជាអ្នកជ្រោមជ្រែងអោយមានកម្មវិធីសង្ក្រាន្តដ៏ធំប្រចាំឆ្នាំ នៅខេត្ត Gifu នោះ បានលើកឡើងថា ជារៀងរាល់ឆ្នាំបងប្អូនខ្មែរ រួមទាំងស្ថានទូតខ្មែរប្រចាំនៅប្រទេសជប៉ុនផង គឺតែងតែរៀបចំកម្មវិធីសង្ក្រាន្តដើម្បីអោយបងប្អូនខ្មែរ បានជួបជុំគ្នាមុនឱកាសចូលឆ្នាំ នៅកម្ពុជា ប៉ុន្តែរាល់ការជួបជុំ គឺមិនធំ និង មានអ្នកចូលរួមច្រើនដូចនៅខេត្ត Gifu នេះទេ ទើបលោកស្រីយល់ថា ការរៀបចំរបស់ក្រុម Bro Kheang Bro Chet និង ប្អូនពលករដែលជាក្រុមការងារទាំងអស់ ក្រោមការសហការយ៉ាងយកចិត្តទុកដាក់ពីសមាគមរបស់លោកស្រី ដែលមានមូលដ្ឋាននៅប្រទេសជប៉ុន គឺជាជោគជ័យដ៏ធំ។
អ្វីដែលលោកស្រីកាន់តែបង្ហាញនូវការកោតសរសើរ គឺទោះបរិយាកាសនៅទីកន្លែងប្រារព្ធនោះ ប្រែជាត្រជាក់ខ្លាំងខុសពីឆ្នាំមុន ក៏នៅតែមានពលករខ្មែរមករួមគ្នាសប្បាយកុះករ និង មិនមានបញ្ហាអសកម្មណាមួយកើតឡើង ដូចអ្វីដែលមានការបារម្ភ។ លោកស្រីថា សង្ក្រានខ្មែរ នៅខេត្ត Gifu មិនត្រឹមតែបង្ហាញពីកម្លាំងសាមគ្គីតែប៉ុណ្ណោះទេ តែក៏ជាវេទិកាជួបជុំ និង ផ្សព្វផ្សាយវប្បធម៌ខ្មែរដ៏សំខាន់ ដើម្បីកុំអោយកូនខ្មែរនឹកស្រុក និង កុំអោយបំភ្លេចនូវវប្បធម៌ប្រពៃណីដ៏ផូរផង់របស់ខ្មែរ។
លោក ខែម សារិទ្ធិ ជាសិល្បករខ្មែរ ដែលបានដំឡើង និង ដឹកនាំកូនខ្មែរ សម្ដែងរបាំត្រុដិនភក្នុងព្រឹត្តិការណ៍នោះ បានគូសបញ្ជាក់ថា សង្ក្រាន្តកូនខ្មែរនៅខេត្ត Gifu គឺបានរួមចំណែកអភិរក្ស និង ថែរក្សាវប្បធម៌ប្រពៃណី សម្រាប់ពិធីបុណ្យចូលឆ្នាំខ្មែរ របស់ខ្មែរដ៏សំខាន់នៅលើទឹកដីប្រទេសជប៉ុន។ អ្វីដែលលោកសម្លឹងឃើញគឺការសាទរនឹងការសម្ដែងរបាំត្រុដិ ដែលសូម្បីតែជនបរទេស និង ជនជាតិជប៉ុនផ្ទាល់ក៏បង្ហាញនូវការចាប់អារម្មណ៍។ ក្នុងឆ្នាំបន្តបន្ទាប់លោករំពឹងថា កម្មវិធីចូលឆ្នាំដែលរៀបចំនៅខេត្ត Gifu មួយនេះ នឹងកាន់តែធំជាងសព្វដង ហើយក្រៅពីបង្ហាញនូវសិល្បៈរបាំត្រុដិ នឹងមានបញ្ចូលនូវរបាំ ឬ សិល្បៈប្រពៃណីខ្មែរ អោយច្រើនជាងនេះ ដើម្បីអោយកូនខ្មែរ នៅទឹកដីជប៉ុន កាន់តែមានទឹកចិត្តស្រលាញ់ និង ជួយថែរក្សាសិល្បៈវប្បធម៌ខ្មែរ បើទោះជាត្រូវរស់នៅឆ្ងាយស្រុក។
គួរបញ្ជាក់ផងដែរ ពិធីសង្ក្រាន្តចូលឆ្នាំខ្មែរ នៅខេត្ត Gifu នេះ ក្រុមការងារផ្ទះតារា រួមមាន លោក ផាត់ តារារដ្ឋ ស្ថាបនិកគ្រួសារតារាកម្ពុជា ដែលជាចាងហ្វាងសារព័ត៌មាន ផ្ទះតារា និង លោក រុន ណាកូ ដែលជាពិធីករផ្ទាល់របស់ ផ្ទះតារា ត្រូវបានអញ្ជើញអោយទៅយកព័ត៌មានដោយផ្ទាល់ ទើបធ្វើអោយព្រឹត្តិការណ៍សំខាន់ៗដែលសមាគមរួបរួមពលរដ្ឋ កម្ពុជា ជប៉ុន និង កូនខ្មែរជាពលករផ្សេងទៀតរួមគ្នាធ្វើ ត្រូវបានផ្សព្វផ្សាយយ៉ាងទូលំទូលាយ នៅក្នុងឆ្នាំនេះ។
