ចាប់តាំងពីថ្ងៃទី២០ មីនា រហូតដល់ថ្ងៃទី១ មេសា ឆ្នាំ២០២៥ ពោលគឺជាង១០ថ្ងៃ ដែល លោក ផាត់ តារារដ្ឋ ស្ថាបនិកគ្រួសារតារាកម្ពុជា និង លោក រុន ណាកូ ពិធីករ ផ្ទះតារា ត្រូវបានអញ្ជើញអោយទៅបំពេញបេសកកម្មនៅក្នុងប្រទេសជប៉ុន ដើម្បីចូលរួមផ្សព្ចផ្សាយវប្បធម៌ និង ចុះទៅយកព័ត៌មានដោយផ្ទាល់ ពីសកម្មភាពសំខាន់ៗរបស់បងប្អូនខ្មែរ ដែលកំពុងរស់នៅ ប្រទេសជប៉ុន។
រយៈពេលជាង១០ថ្ងៃ នៅក្នុងប្រទេសជប៉ុននេះ លោក និង ក្រុមការងារ ត្រូវបានសមាគមរួបរួមពលរដ្ឋ កម្ពុជា-ជប៉ុន ក្រោមការដឹកនាំរបស់លោកស្រី ឆោម ស្រស់ និង លោក ខែម សារិទ្ធិ ដែលបានអញ្ជើញដោយផ្ទាល់ រៀបចំអោយមានដំណើរកម្សាន្ត ដំណើរទស្សនកិច្ច នៅតាមបណ្ដាខេត្ត និង ក្រុងសំខាន់ៗមួយចំនួន ដែលមានបងប្អូនខ្មែររស់នៅ។
ការអញ្ជើញចូលរួម របស់ លោក ផាត់ តារារដ្ឋ និង ក្រុមការងារ ពីប្រទេសកម្ពុជា ទៅដល់ប្រទេសជប៉ុននេះ ទី១ គឺដើម្បីអោយលោក ធ្វើជាគណកម្មការដាក់ពិន្ទុ ក្នុងកម្មវិធីប្រលងចម្រៀងសំនៀងកូនខ្មែរធំមួយ ដែលបានធ្វើឡើងកាលពីថ្ងៃទី២៣ មីនា ឆ្នាំ២០២៥ ក្រោមការរៀបចំដោយសមាគមរួបរួមពលរដ្ឋ កម្ពុជា – ជប៉ុន ដែលត្រូវបានគេចាត់ទុកថាគឺកម្មវិធីប្រលងចម្រៀងប្រចាំឆ្នាំធំមួយ ដែលមានពលករខ្មែរនៅទូទាំងប្រទេសចូលរួមរហូតដល់រាប់រយនាក់ ទាំងអ្នកដាក់ពាក្យប្រកួតប្រជែង ទាំងអ្នកចូលរួមទស្សនា ក្នុងថ្ងៃផ្ដាច់ព្រ័ត្រ។
ការប្រលងចម្រៀង ដែលលោក ផាត់ តារារដ្ឋ ស្ថាបនិកគ្រួសារតារាកម្ពុជា ធ្វើជាគណកម្មការដាក់ពិន្ទុនេះ បានធ្វើឡើងនៅទីក្រុង ក្យូតុ និង ជាកម្មវិធីទទួលបានជោគជ័យគួរជាទីមោទនៈ ដោយអាចជម្រើសបានជ័យលាភី៣រូបដែលសុទ្ធតែជាពលករមានសំលេងល្អ អោយក្លាយជាតារាអាជីព និង ជម្រើសបានបេក្ខភាព ដែលជាម្ចាស់ពានឆ្នើមចំនួន៥រូប។
លោក ផាត់ តារារដ្ឋ បានគូសបញ្ជាក់ថា ការប្រលងចម្រៀងកូនខ្មែរនៅក្នុងប្រទេសជប៉ុននេះ បានរួបចំណែកយ៉ាងខ្លាំងក្នុងការបង្កើតនូវចំណងមិត្តភាពរវាងពលករ និង ពលករ ហើយក៏ជាការប្រកួតក្នុងវិស័យចម្រៀង ដែលជួយសម្រេចក្ដីស្រម៉ៃដ៏ធំរបស់កូនខ្មែរនៅក្នុងប្រទេសជប៉ុន ដែលស្រលាញ់សិល្បៈចម្រៀង។
ការប្រលងនេះ លោកចាត់ទុកថា គឺជារៀបចំធំដុំនៅក្នុងទឹកដីប្រទេសជប៉ុន ព្រោះក្រៅពីមានគណកម្មការសុទ្ធតែជាបុគ្គលឆ្នើមៗមកពីប្រទេសកម្ពុជា ដែលក្នុងនោះក៏មាន លោក គួច ខេវិន ដែលលោកបានអញ្ជើញអោយចូលរួមជាមួយផង ក៏មានវត្តមានដ៏ខ្ពង់ខ្ពស់ របស់ ឯកឧត្តម ទុយ រី ឯកអគ្គរាជទូតកម្ពុជា ប្រចាំនៅប្រទេសជប៉ុន និង តំណាងសមាគម ក៏ដូចជាតំណាងរដ្ឋាភិបាលជប៉ុន ជាគណអធិបតី និង ជាភ្ញៀវកិត្តិយស ដែលញាំងអោយការប្រកួតកាន់តែអធឹកអធម។
កម្មវិធីធំមួយទៀត ដែលលោកក៏បានអញ្ជើញចូលរួមយ៉ាងសំខាន់ដែរនោះ គឺកម្មវិធីសង្ក្រាន្ត កូនខ្មែរ ដែលបានធ្វើឡើងនៅខេត្ត Gifu កាលពីថ្ងៃទី៣០ មីនា ឆ្នាំ២០២៥ ដែលមានបងប្អូនពលករខ្មែរ ចូលរួមរហូតដល់ប្រមាណ២ពាន់នាក់។ លោកថា កម្មវិធីសង្ក្រាន្តចូលឆ្នាំ ដែលលោកបានចូលរួមជាភ្ញៀវកិត្តិយស និង បានបង្ហាញនូវការសំណេះសំណាលដោយផ្ទាល់ទៅកាន់ប្អូនៗជាពលករនេះ ការរៀបចំជាអ្នកចុះយកព័ត៌មាននេះ ជាការរៀបចំដោយ Bro Kheang . Bro Vichet និង ស្ថាបនិកឆ្នើមៗចំនួន២រូបទៀត ដោយមានការសហការរៀបចំ ពីសមាគមរួបរួមពលរដ្ឋ កម្ពុជា ជប៉ុន ដែលជាអញ្ជើញ លោក និង ក្រុមការងារ អោយទៅបំពេញទស្សនកិច្ចដោយផ្ទាល់។
សង្ក្រាន្តកូនខ្មែរដ៏កក្រើកនេះ លោក កត់សម្គាល់ថា បានបង្ហាញពីកម្លាំងសាមគ្គី និង បានរួមចំណែកដ៏ធំក្នុងការចូលរួមផ្សព្វផ្សាយពីវប្បធម៌ខ្មែរ ទៅកាន់ក្រសែភ្នែកអន្តរជាតិ។ អ្វីដែលលោកកោតសរសើរ គឺការចូលរួមយ៉ាងច្រើនកុះករពីសំណាក់កូនខ្មែរ រស់នៅនៅក្នុងប្រទេសជប៉ុន ដែលការជួបជុំដ៏ច្រើនបែបនេះ លោកថា មិនមែនជារឿងងាយនឹងអាចរៀបចំឡើយ នៅក្នុងប្រទេសជប៉ុន។
លោកក៏កោតសរសើរចំពោះអ្នករៀបចំកម្មវិធីទាំង២កម្មវិធីផងដែរ ដែលទោះជាកំពុងបំពេញកាតព្ចកិច្ចបម្រើការរកលុយនៅក្នុងប្រទេសជប៉ុន ស្ទើរតែរកពេលសម្រាកមិនបាន តែនៅតែបានផ្ដួចផ្ដើមអោយមានការប្រលងចម្រៀងកូនខ្មែរ និង អោយមានសង្ក្រាន្តកូនខ្មែរ ដើម្បីអោយបងប្អូនពលករបានជួបជុំគ្នា និង ចូលរួមអភិរក្សសិល្បៈវប្បធម៌។ ក្នុងនោះការបង្ហាញម្ហូបអាហារខ្មែរនៅក្នុងកម្មវិធីទាំងពីរ ក៏ជារឿងកម្រ ដែលលោកកោតសរសើរ ។
លោក ផាត់ តារារដ្ឋ បានបង្ហាញនូវមោទនភាពយ៉ាងខ្លាំង ដែលលោក និង ក្រុមការងារ ត្រូវបានផ្ដល់កិត្តិយសយ៉ាងពេញទំហឹង និង ទទួលបានការស្វាគមន៍យ៉ាងកក់ក្ដៅពីប្រធាន ពីអនុប្រធានសមាគមខ្មែរ ប្រចាំនៅប្រទេសជប៉ុន និង ពីពលករខ្មែរដែលរស់នៅទីនោះ ពេញរយៈពេលជាង១០ថ្ងៃ ដែលលោកបានចុះទៅបំពេញបេសកកម្ម និង យកព័ត៌មាន នៅក្នុងប្រទេសជប៉ុន។
លោកសង្ឃឹមថា រាល់សកម្មភាពដែលលោក និង ក្រុមការងារ បានផ្ដិតរូបភាពយកមកផ្សព្វផ្សាយដោយផ្ទាល់ នឹងក្លាយជាកម្លាំងជំរុញកាន់តែខ្លាំង លើកទឹកចិត្តដល់កូនខ្នែរ នៅលើទឹកដីជប៉ុន អោយកាន់តែបន្តរួមចំណែកបង្កើតនូវសកម្មភាពល្អៗជាប្រយោជន៍ជាច្រើនទៀត ដល់សិល្បៈវប្បធម៌ និង ពលករខ្មែរ ដែលកំពុងរស់នៅ និង បម្រើការនៅក្នុងប្រទេសនោះ។
