ចាត់ទុកថា គឺជាមោទនភាពធំមួយ ដែលសង្ក្រាន្តកូនខ្មែរ នៅក្នុងប្រទេសជប៉ុន ដែលបានធ្វើឡើងកាលពីថ្ងៃទី៣០ មីនា ឆ្នាំ២០២៥ នៅខេត្ត Gifu បានបង្អួតរបាំត្រុដិយ៉ាងលេចធ្លោរ ក្រោមក្រសែភ្នែករបស់ជនបរទេស និង កូនខ្មែររាប់ពាន់នាក់ ដែលបានចូលរួម ខណៈដែលការសម្ដែងរបាំត្រុដិបែបនេះ មិនមែនជារឿងងាយស្រួល នៅក្នុងប្រទេសជប៉ុន។
លោក ខែម សារិទ្ធ អនុប្រធានសមាគមរួបរួមពលរដ្ឋ កម្ពុជា ជប៉ុន គឺជាអ្នកដំឡើងរបាំនេះ និង ជាអ្នកដឹកនាំការសម្ដែង ដែលធ្វើអោយព្រឹត្តិការណ៍សង្ក្រាន្តទាំងមូល ពោរពេញដោយការផ្សព្វផ្សាយពីសិល្បៈវប្បធម៌ខ្មែរដ៏គួរអោយសរសើរ។ លោក ខែម សារិទ្ធិ បានលើកឡើងថា ឧបករណ៍ត្រុដិ ដែលយកមកសម្ដែងនេះ មិនអាចដឹកមកឆ្លងប្រទេសពីស្រុកខ្មែរបានទេ ក្រៅតែពីស្គរ មួក សំលៀកបំពាក់ និង កន្ទុយក្ងោក ដោយត្រូវកែច្នៃ និង ដំឡើងដោយគំនិតច្នៃប្រឌិតទាំងអស់ នៅក្នុងប្រទេសជប៉ុន។
វាមិនមែនជារឿងងាយស្រួលទេ ដោយសារតែនៅក្នុងប្រទេសជប៉ុន ពិបាកស្វែងរកសម្ភារៈ និង ឧបករណ៍ ដែលអាចដំឡើងជាឧបករណ៍ត្រុដិបាន និង ដើម្បីអោយត្រូវទម្រង់ពេញលេញ។ ប៉ុន្តែលោក នៅតែអាចធ្វើបាន នៅតែអាចដំឡើងអោយចេញជារូបរាងបាន ហើយបើទោះជាការកែច្នៃខ្លះ មិនត្រូវពេញលេញ តែក៏អាចចាត់ទុកថា បានក្លាយជាឧបករណ៍ត្រុដិ ដែលអាចសម្ដែងបាន ដើម្បីបង្ហាញអោយឃើញនូវទម្រង់របាំនេះ ជាការរំលេចនូវវប្បធម៌ខ្មែរផងដែរ។
ក្នុងនោះការស្វែងរកសិល្បករ សិល្បការិនី ដើម្បីអោយចេញជាវង់សម្រាប់សម្ដែង ក៏រឹតតែស្មុគស្មាញផងដែរ ដោយសារនៅប្រទេសជប៉ុនមិនមានអ្នកជំនាញសិល្បៈ និង មិនមានពេលវេលាជួបជុំគ្នា ដើម្បីហ្វឹកហាត់។ ជាក់ស្ដែង របាំត្រុដិដែលបានសម្ដែងជាលើកដំបូងនៅក្នុងប្រទេសជប៉ុន កាលពីថ្ងៃទី៣០ មីនា ឆ្នាំ២០២៥ គឺលោកបានត្រឹមតែពន្យល់ និង បង្វឹកអ្នករាំត្រឹមតែមួយម៉ោងមុនសម្ដែងប៉ុណ្ណោះ តែបានផ្ញើវីដេអូយូធូប ដើម្បីអោយពលករដែលមានឈ្មោះចូលសម្ដែងទស្សនាជាមុន។
លោក ខែម សារិទ្ធិ ពោលថា “អ្នកខ្លះយល់ថាធម្មតា ប៉ុន្តែការសម្ដែងរបាំត្រុដិនៅក្នុងប្រទេសជប៉ុន មិនមែនជារឿងងាយស្រួលទេ ទី១គឺពិបាកក្នុងការកែច្នៃអោយចេញជាឧបករណ៍ ទី២គឺពិបាករកអ្នករាំ ហើយពលករនៅក្នុងប្រទេសជប៉ុន ទំនេរតែថ្ងៃអាទិត្យប៉ុណ្ណោះ ដូច្នេះដូចករណីត្រូវសម្ដែងបែបនេះ គឺមានតែពេលមួយម៉ោង ឬ ២ម៉ោងមុនសម្ដែងប៉ុណ្ណោះ ដើម្បីហាត់សម និង បង្វឹក”។
យ៉ាងណាមិញ លោកចាត់ទុកថា ជោគជ័យ ដោយសារតែការសម្ដែងរបាំត្រុដិរបស់លោក ដែលជាការសម្ដែងជាលើកដំបូងនៅក្នុងប្រទេសជប៉ុន គឺទទួលបានការគាំទ្រខ្លាំង ពិសេសពីសំណាក់បងប្អូនខ្មែររាប់ពាន់នាក់ ដែលមកលេងសង្ក្រាន្ត និង ភ្ញៀវបរទេស។ ជាពិសេសគឺបន្ទាប់ពីក្រុមការងារផ្ទះតារា បានចុះទៅផ្ដិតយកព័ត៌មានដោយផ្ទាល់ ដល់ប្រទេសជប៉ុននោះតែម្ដង។
គួរបញ្ជាក់ផងដែរថា ការសម្ដែងរបាំត្រុដិ ដែលគេកម្រឃើញនៅលើទឹកដីប្រទេសជប៉ុននេះ គឺបានធ្វើឡើងនៅក្នុងព្រឹត្តិការណ៍សង្ក្រាន្តកូនខ្មែរ ដែលរៀបចំឡើងនៅក្នុងខេត្ត Gifu នៅក្នុងប្រទេសជប៉ុន កាលពីថ្ងៃទី៣០ មីនា ឆ្នាំ២០២៥។ ព្រឹត្តិការណ៍នេះ គេឃើញមានកូនខ្មែរជាពលកររហូតដល់ប្រមាណ២នាក់មកពីគ្រប់ទិសទីចូលរួម និង ត្រូវបានគេចាត់ទុកថា គឺជាព្រឹត្តិការណ៍ជួបជុំសប្បាយរបស់បងប្អូនខ្មែរទ្រង់ទ្រាយធំជាងគេប្រចាំឆ្នាំ មុនចូលឆ្នាំខ្មែរ។
ព្រឹត្តិការណ៍ក្រៅពីមានការសម្ដែងរបាំត្រុដិ ក៏មានការរាំច្រៀងចង្វាក់ប្រពៃណីខ្មែរ និង បទសប្បាយៗ ដែលបកស្រាយដោយកូនខ្មែររស់នៅប្រទេសជប៉ុន ប្រកបដោយបរិយាកាសជួបជុំយ៉ាងសប្បាយរីករាយ។ នេះគឺជាព្រឹត្តិការណ៍ដែលរៀបចំដោយ Bro Kheang. Bro Vichet និង ក្រុមពលករជាច្រើនទៀត ក្រោមការសហការជ្រោមរបស់សមាគមរួបរួមពលរដ្ឋ កម្ពុជា ជប៉ុន ដែលមាន លោកស្រី ឆោម ស្រស់ ជាប្រធាន។ ព្រឹត្តិការណ៍នេះ ក៏ត្រូវបានអញ្ជើញ ក្រុមការងារ ផ្ទះតារា អោយទៅផ្ដិតព័ត៌មាន ដោយផ្ទាល់ផងដែរ។
