នៅទីបំផុត ក្ដីស្រម៉ៃរបស់តារាសម្ដែង កញ្ញា រចនា វត្តី ដែលមានឈ្មោះពិតថា ផន សុភ័ក្ត្រ បានក្លាយជាការពិតហើយ ដោយក្រោយចូលប្រកួត Miss Global Cambodia 2024 ហើយទទួលបានតំណែងលំដាប់រងទី១ 1st Runner Up ដែលជាតំណែងលេចធ្លោរមួយ នៅក្នុងការប្រកួតវិស័យបវរកញ្ញា។
ការប្រកួតផ្ដាច់ព្រ័ត្រ ដែលបានបញ្ចប់កាលពីថ្ងៃទី ២០ វិច្ឆិកា ឆ្នាំ២០២៤ នេះ បេក្ខនារីដែលតំណាងអោយខេត្តតាកែវរូបនេះ មិនត្រូវតែស្រស់សោភាព និង លេចធ្លោរសមត្ថភាពផ្នែកដើរបង្ហាញសម្រស់នៅលើឆាកនោះទេ តែចំណេះដឹងរបស់នាងក៏មិនសរសើរមិនបានផងដែរ ដោយក្រៅពីឆ្លាតវ័យ ក៏អាចឆ្លើយសំនួរជាភាសាអង់គ្លេសបានយ៉ាងល្អ ដែលកាន់តែធ្វើអោយហ្វេនៗមើលឃើញពីសមត្ថភាព និង ចំណេះដឹងរបស់នាងទ្វេដង។
ជាមួយនឹងលទ្ធផលលេចធ្លោរនេះ រចនា វត្តី ក៏ប្រកាសជំហរ នឹងប្រើ Platform Miss Global Cambodia 2024 នេះ ធ្វើការងារសង្គមអោយបានច្រើនជាងមុន ខណៈដែលនាងក៏ត្រូវគេស្គាល់ថា សកម្មក្នុងការងារសប្បុរសធម៌រួចមកហើយ ជាពិសេសជាមួយទុរគតជន ក្មេងកំព្រា និង សិល្បករដែលមានជីវភាពខ្វះខាតជាដើម។
រចនា វត្តី និយាយថា នេះជាក្ដីស្រម៉ៃដែលនាងចង់បានតាំងពីចូលប្រឡូកសិល្បៈ ហើយនាងរំពឹងថា ក្រោយពេលគ្រងតំណែងនេះ ការងារសិល្បៈនឹងកាន់តែរីកចំរើន ជាពិសេសការងារថតម៉ូត ថតស្ពត និង ក្លាយជា BA របស់ក្រុមហ៊ុនធំៗជាដើម។
នាងថា រយៈពេល៥ខែហើយ ដែលនាងបានលះបង់ការងារ ហើយពុះពារតែជាមួយនឹងការងារប្រលង Miss Global Cambodia ហើយក៏មិននឹកស្មានថា អ្វីដែលនាងប្រឹងប្រែង បានក្លាយជាការពិតដែរ។ នាងថាសប្បាយចិត្ត ហើយក៏មិនអន់ចិត្តដែរ ដែលបានលំដាប់រងទី១ ផ្ទុយទៅវិញនាង ជូនពរអោយកញ្ញាឯកម្ចាស់មកុដ ទទួលបានជោគជ័យ នៅក្នុងការប្រកួត Miss Global International នាថ្ងៃខាងមុខនោះផង។
