កាលពីរាត្រីថ្ងៃទី 25 ខែ តុលា ឆ្នាំ2024 មុននេះឯកឧត្តម ហ៊ុន ម៉ានី ប្រធានសហព័ន្ធយុវជនកម្ពុជា បានអញ្ជើញជាអធិបតីភាពដ៏ខ្ពង់ខ្ពស់នៅក្នុងកម្មវិធីសម្ភោធភាពយន្ត Hollywood រឿង « 1660 VINE » ដែលជាប្រភេទភាពយន្តលាយឡំជាមួយនឹងតន្ត្រីថ្មីមួយដែលនិពន្ធដោយផលិតករបរទេស ក្រោមស្នាព្រះហស្តសម្តែងជាតួអង្គឯកដោយ អ្នកអង្គម្ចាស់ នរោត្តម រស្មីខែមុន្នី ព្រះរាជភាគិនេយ្យ នៃព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ព្រមទាំងជាព្រះបុត្រា នៃសម្តេចរាជបុត្រី ព្រះអនុជ នរោត្តម អរុណរស្មី និង ឯកឧត្តម កែវ ពុទ្ធរស្មី។
ព្រះជន្មទើបតែ 27 ព្រះវស្សាតែអ្នកអង្គម្ចាស់ នរោត្តម រស្មីខែមុន្នី ចម្រើនវ័យជាមួយនឹងរូបរាង្គស្រស់សង្ហារ ទ្រង់ហាក់សព្វព្រះទ័យ ថែមទាំងមានដុងផ្នែកវិស័យសិល្បៈពិសេសចម្រៀង និង សម្ដែង នៅក្នុងផ្ទៃរឿងទាំងមូលស្នាព្រះហស្ថរបស់ទ្រង់ត្រូវបានអ្នកទស្សនានៅក្នុងថ្ងៃ Pre Screening សរសើរមិនដាច់ពីមាត់ចំពោះទេពកោសល្យដ៏ល្អអស្ចារ្យមួយនេះ។
ភាពយន្ត Hollywood ដ៏កម្រដែលមានស្នាព្រះហស្ថសម្ដែងដោយឈាមជ័រសែរាជវង្សកូនខ្មែរនេះផងដែរគឺពិតជា សាកសមបំផុតចំពោះយុវវ័យជាពិសេសអ្នកលេងបណ្ដាញសង្គម ឬ អ្នកបង្កើតមាតិកា ដែលចូលចិត្តបង្ហាញខ្លួន ក៏ដូចជាសកម្មភាពតាមរយៈ Social Media ដើម្បីទទួលបានប្រជាប្រិយភាព និង មានអ្នកចាប់អារម្មណ៍ ព្រមទាំងជាកូនសោរឱ្យយើងអាចស្វែងរកខ្លួនឯងឃើញតាមរយៈចំណង់ចំណូលចិត្តពីធម្មជាតិរបស់ខ្លួន។
ជាពិសេសជៀសវៀងឱ្យយុវវ័យ ឬ អ្នកលេងបណ្ដាញសង្គមមានការប្រុងប្រយ័ត្នចំពោះការផលិតមាតិការរបស់ខ្លួនដើម្បីកុំឱ្យមានផលប៉ះពាល់ទៅដល់សង្គម និង ឬ ទទួលបានការផលអវិជ្ជមានតាមបណ្ដាញផ្សព្វផ្សាយ។
នៅក្នុងថ្ងៃសម្ភោធ The premier show of « 1660 Vine » នេះផងដែរក្រៅពីមានព្រះរាជវត្តមានសែរាជវង្ស និង ថ្នាក់ដឹកនាំដែលជាបុគ្គលល្បីៗក្នុងនោះក៏រួមមានវត្តមានសិល្បករ សិល្បការិនី បវរកញ្ញាលំដាប់ប្រទេសកម្ពុជាជាច្រើនរូបបានអញ្ជើញចូលរួមជាភ្ញៀវកិត្តយស និង ដើរលើកម្រាលព្រំដ៏អស្ចារ្យនៅក្នុងរាត្រីដ៏គួរឱ្យចងចាំនេះផងដែរ។
គួរបញ្ជាក់ផងដែរថា រឿង « 1660 Vine » នឹងចាក់បញ្ចាំងនៅរោងភាពយន្ត Major Cineplex by Smart ថ្ងៃទី 15 វិច្ឆិកា 2024 ឆាប់ៗខាងមុខនេះ នៅគ្រប់រោងភាពយន្តទូទាំងខេត្ត-ក្រុង នៃប្រទេសកម្ពុជា។
