អ្នកលេងបណ្ដាញសង្គមច្រើនណាស់ កំពុងផ្ទុះអារម្មណ៍ស្រឡាំងកាំង នៅពេលម្ចាស់ឈុតបន្តលាតត្រដាងពីអត្ថន័យឈុត ហើយបើទោះជាត្រូវអ្នកខ្លះយល់ថា នេះជាការពន្យល់បែបលើសៗ ក៏លោក Oliva Kong នៅតែរក្សាជំហរថាឈុតដែលលោកបានបង្ហាញគឺពិតជាជាប់ពាក់ព័ន្ធនឹងបាតុភូតព្រះអាទិត្យ នៅចំកំពូលអង្គរ និងថាជាឈុតដែលពោរពេញដោយអត្ថន័យ។
មនុស្សភាគច្រើនបានត្រឹមតែមើលឃើញថា មួយឈុតរបស់ Oliva Kong និង លោកឪពុក អ្នកម្ដាយ ដែលបានថតបង្ហាញនៅមុខអង្គរនេះ ថាជាឈុតស្រស់ស្អាត និង ស្លៀកទៅសម ហើយបង្ហាញពីអត្តសញ្ញាណខ្មែរប៉ុណ្ណោះ ដោយមិនបានដឹងថាឈុតនេះ ពោរពេញដោយអត្ថន័យលើសពីការគិត និងបានបង្កប់នូវខ្លឹមសារដែលជាប់ពាក់ព័ន្ធនឹងបាតុភូតព្រះអាទិត្យ ដែលរះនៅចំកណ្ដាលប្រាសាទអង្គរវត្តនោះឡើយ។
លោក Oiva Kong អ្នកច្នៃម៉ូដ និង ជាអ្នកស្លៀកឈុតនេះដោយផ្ទាល់បានលើកឡើងថា មនុស្សភាគច្រើនបានត្រឹមតែដឹងថា នេះជាឈុតដែលឆ្លុះបញ្ចាំងពីសម័យអាណានិគមបារាំង និងជាឈុតបង្ហាញពីសាច់ហូលខ្មែរ ដែលជាអត្តសញ្ញាណរបស់កម្ពុជា។ ប៉ុន្តែនៅពីក្រោយភាពស្រស់ស្អាតដែលឃើញដោយភ្នែកទទេនេះ គឺមួយឈុតនេះ លោកបានច្នៃឡើង ដោយបង្កប់នូវអត្ថន័យដ៏កម្រ លោកថា ហូលដែលប្រើយកមកច្នៃ គឺហូលរបស់អ្នកតាកែវ ដែលចង់បង្ហាញអោយសាធារណជន បន្តគាំទ្រស្នាដៃហូលខ្មែរ ស្នាដៃហូលអ្នកតាកែវ ដែលជាហូលល្អឯកគ្មាន២ ដែលលើពិភពលោក មិនទាន់មានស្នាដៃហូលណាដែលស្អាត និង ល្អដូចនៅឡើយ។
មួយឈុតនេះ ក៏ជាការផ្សព្វផ្សាយពីប្រាសាទអង្គរ និង ជាការចងក្រងអនុស្សាវរីយ៍ជាមួយលោកឪពុក អ្នកម្ដាយ ក្នុងឱកាសដង្ហែអង្គកឋិនទៀន នៅខេត្តសៀមរាបផងដែរ។
លោកបង្ហាញមោទនភាព ដែលបានរួមចំណែកជួយលើកកម្ពស់អត្តសញ្ញាណជាតិ និង បានធ្វើកឋិនជូនលោកឪពុកអ្នកម្ដាយ ដោយលោកបញ្ជាក់ថា ក្នុងនាមជាកូនគួរតែខិតខំធ្វើរឿង ដែលអោយអ្នកមានគុណមានស្នាមញញឹម និង មានមោទនភាព ហើយធ្វើអោយទាន់អ្នកមានគុណនៅមានកម្លាំង ដើម្បីជាភាពកត្តញូ និង ដើម្បីជាសារអោយកូនគ្រប់រូប ចេះលះបង់ចំពោះឪពុកម្ដាយ អោយដូចគ្នានឹងអ្នកមានគុណ បានស៊ូលះបង់ចំពោះកូនៗ។
Oliva Kong ថាខ្លួនមិនមែនជាអ្នកមានទេ តែអោយតែអ្វីដែលលោកស៊ូបាន គឺមិនថាច្នៃឈុត ដើម្បីលើកស្ទួយសិល្បៈវប្បធម៌ខ្មែរ ឬ ធ្វើអ្វីដើម្បីអ្នកមានគុណ គឺលោកត្រូវតែធ្វើអោយហើយ គឺមិនចាំទាល់តែមាន ឬ សំបូរទេ ដោយសារតែលោកមិនចង់អោយមានពាក្យថាហួសពេល និង មានវិប្បដិសារី។
