ម្ចាស់ពាន Cambodian idol រដូវកាលទី4 លោក លឹម តិចម៉េង បានធ្វើឱ្យមានការពុះកញ្ជ្រោលនៅក្នុងកម្មវិធី ពិព័រណ៌នៃក្ដីស្រឡាញ់ កាលពីល្ងាចថ្ងៃទី 13 កុម្ភះ ឆ្នាំ2023 មុននេះនៅឯបរិវេណផ្សារទំនើប ជីបម៉ុង មេហ្គាម៉ល271។ អ្វីដែលគួរឱ្យភ្ញាក់ផ្អើលវត្តមានម្ដាយឪពុករបស់តារាចម្រៀងវ័យក្មេងរូបនេះ បានមកទស្សនាកូនប្រុសនៅខាងក្រោមឆាកតន្ត្រីផ្ទាល់ព្រមទាំងធ្វើការពញ៉ាក់អារម្មណ៍ដល់កូនប្រុស បង្ហាញក្ដីនឹករលឹក និង ក្ដីស្រឡាញ់ដល់កូន រហូតធ្វើឱ្យអ្នកទស្សនាទប់អារម្មណ៍មិនជាប់ស្រក់ រំជើបរំជួលទប់ទឹកភ្នែកពេញឆាកតន្ត្រី។
លោក លឹម តិចម៉េង បានបង្ហាញពីក្ដីរំភើបនិងនឹកស្មានមិនដល់ថា ខ្លួនពិតជាមិននឹកស្មានថាបានឃើញវត្តមានអ្នកមានគុណរបស់ខ្លួនទាំងពីរនៅលើឆាកតន្ត្រីទាំងគូបែបនេះជាថ្មីម្ដងទៀត ព្រោះក្រោយពេលដែលលោកទទួលបានជោគជ័យលើវិថីសិល្បៈឪពុក និង ម្ដាយ របស់ខ្លួនបានលែងលះគ្នា ហើយលោកក៏មិនសង្ឃឹមថាមានថ្ងៃនេះផងដែរ។ ទោះជាយ៉ាងណាលោកក៏នៅតែទទួលយកការពិត និង មានតែសង្ឃឹមថាបើសិនជាអាចប្ដូរនឹងសុភមង្គលគ្រួសារជាមួយនឹងភាពជោគជ័យរបស់លោក លោកក៏ព្រមនឹងប្ដូរ ដើម្បីឱ្យម្ដាយឪពុកបានរស់នៅជួបជុំគ្នាដូចកាលពីមុន។
ក្រៅពីវត្តមានលោក លឹម តិចម៉េង ក៏នៅមានការចូលរួមសម្ដែងដោយក្រុមតារាចម្រៀង Barber Family. ម្ចាស់បទ សាក់ប្រឡាក់កាយ លោក C Be Nato និងតារាផ្សេងទៀត។ ហើយអ្វីដែលកាន់តែពិសេសទៀតនោះនៅថ្ងៃទី 14 ខែកុម្ភះនេះ វត្តមានកញ្ញា សុខ ពិសី នឹងមកបិទកម្មវិធីពិព័រណ៌នៃក្ដីស្រឡាញ់ថ្ងៃចុងក្រោយនេះដែរជាមួយនឹងតារាចម្រៀងផ្សេងៗទៀតចាប់ពីម៉ោង6ល្ងាចតទៅ។
គួរបញ្ជាក់ផងដែរថា ពិព័រណ៍ដែលធ្វើឡើងនេះ មិនត្រឹមតែដើម្បីអោយតារាល្បីៗ និង អ្នកគាំទ្រ ហើយបានទស្សនាមុខទំនិញតែម្យ៉ាងនោះទេ ប៉ុន្តែនឹងប្រមូលមូលនិធិ ដើម្បីជួយដល់កុមាររងគ្រោះ និង កុមារកំព្រា ក្រោយពេលបញ្ចប់ពិធីផងដែរ ដែលកាន់តែធ្វើអោយគេមើលឃើញពីគុណតម្លៃ នៃការរៀបចំ។ មហាព្រឹត្តិការណ៍មួយនេះ ក៏ចាត់ទុកថា គឺពិព័រណ៍ប្រចាំឆ្នាំធំមួយ ដែលប្រមូលផ្ដុំដោយមុខទំនិញចម្រុះប្រភេទ ដែលជាម៉ាកល្បីៗ ដែលក្នុងនោះក៏មានពិព័រណ៍មុខម្ហូប ភេសជ្ជៈ វត្ថុអនុស្សាវរីយ៍ និង ផលិតផលរាប់រយមុខ អមដោយការបញ្ចុះតម្លៃ និង មានផ្ដល់ជូននូវឆ្នោតផ្សងសំណាង។
